काठमाडौ फागुन १२ ।  १ जनाको ज्यान जानेगरी ललितपुरको नख्खुस्थित एनसेल कार्यालयमा भएको बम विस्फोटको जिम्मा नेत्रबिक्रम चन्द (विप्लव) नेतृत्वको नेकपाले लिएको छ । विप्लव नेतृत्वको नेकपाका एक नेताले आफूहरुले नै नख्खुस्थित एनसेलको कार्यालयमा बम विस्फोट गराएको बताए ।
पांच करोड चन्दा नदिए पछी बम बिष्फोट गराएको उनीहरुको भनाई छ।
शुक्रबार साँझ नख्खुस्थित एनसेल टावरमा भएको बम विस्फोटमा ३ जना घाइते भएका थिए । घाइतेमध्ये एकजना सिंहप्रसाद गुरुङको उपरचारका क्रममा मृत्यु भएको थियो ।

अन्य घाइते २ जनाको अहिले उपचार भइरहेको छ ।

नख्खुस्थित एनसेल कार्यालयसँगै देशका विभिन्न ठाउँमा पनि एनसेलका टावरमा आगजनी भएको छ । विप्लव नेतृत्वको नेकपाका नेताले एनसेलका टावरमा भएको आगजनी र कार्यालयमा भएको बम विस्फोट आफूहरुकै योजनाअनुसार भएको बताए ।

विप्लव नेतृत्वको नेकपाका नेताले आफूहरुको मानवीय क्षति गर्ने उद्देश्य नरहेको बताए । ‘७५ अर्ब रुपैयाँ कर छलेको र नेपालबाट गरेको आम्दानी विदेशमा लगानी गरेको कम्पनीविरुद्ध हामीहरुले देशव्यापी रुपमा नै विभिन्न कदम चाल्ने योजना बनाएका थियौं,’ नाम उल्लेख नगर्ने शर्तमा नेकपा नेताले भने, ‘तर, ललितपुरस्थित एनसेल कार्यालयमा भएको बम विस्फोटमा परी मानवीय क्षति हुन पुग्यो । यो दुःखद घटना भएको पार्टीले स्वीकार गरेको छ ।’