काठमाडौं, २५ पुस । पूर्वी नेपालको प्रतिष्ठित पाँचतारे होटल सोल्टी वेस्टेन्ड इटहरीको स्वामित्व रहेको होटल गरिमा लिमिटेडले सर्वसाधारणका लागि प्रारम्भिक सार्वजनिक निष्काशन (आईपीओ) जारी गर्ने निर्णय गरेको छ । कम्पनीले यस निष्काशनका लागि लक्ष्मी सन्राइज क्यापिटल लिमिटेडलाई निष्काशन तथा बिक्री प्रबन्धक नियुक्त गरेको छ ।

कम्पनीले प्रतिकित्ता रु. १०० अंकित दरमा ४० लाख कित्ता साधारण शेयर जारी गर्नेछ, जसको कुल मूल्य रु. ४० करोड हुनेछ । यससम्बन्धी सम्झौतापत्रमा होटल गरिमा लिमिटेडका प्रबन्ध निर्देशक विनोद पौडेल र लक्ष्मी सन्राइज क्यापिटल लिमिटेडका प्रमुख कार्यकारी अधिकृत विजयलाल श्रेष्ठबीच पुस २५ गते काठमाडौंको नयाँ बानेश्वरमा हस्ताक्षर भएको हो ।

कम्पनीका अनुसार आईपीओ निष्काशनले संस्थागत विकास र पारदर्शिता अभिवृद्धिसँगै कोशी प्रदेशमा पर्यटन तथा आतिथ्य उद्योगको प्रवर्द्धनमा योगदान पुग्ने अपेक्षा गरिएको छ ।

सोल्टी होटल एन्ड रिसोर्ट समूहको व्यवस्थापनमा सञ्चालनमा रहेको उक्त होटलमा १ रोयल सुइट, ८ सुइट, ८ एक्जेक्युटिभ रुम, ५८ डिलक्स रुम र ७ स्टुडियो रुम रहेका छन् । साथै, होटलमा दुई व्याङ्केट हल, तीन सेमिनार हल, ‘नुवाड थाई’ स्पा, जिम, रेस्टुरेन्ट तथा क्याफे लाउन्ज लगायतका सुविधा उपलब्ध छन् ।