काठमाडौं, २५ पुस । सन नेपाल लाइफ इन्स्योरेन्स कम्पनी लिमिटेडको आठौँ तथा नवौँ वार्षिक साधारण सभा शुक्रवार काठमाडौस्थित अमृतभोग केटरर्स प्रा. लि., कालिकास्थानमा सम्पन्न भएको छ।

सभाको अध्यक्षता संचालक समितिका अध्यक्ष अनुज क्यालले गरेका थिए। साधारण सभाले आर्थिक वर्ष २०८०/८१ र २०८१/८२ का वार्षिक प्रतिवेदन, लेखापरीक्षकको प्रतिवेदन, बैलेंससिट, नाफा(नोक्सान हिसाब, इक्विटी परिवर्तन तथा नगद प्रवाह विवरण सहितको वित्तीय विवरण पारित गरेको छ।

सभा निर्णयअनुसार, लेखापरीक्षकको नियुक्ति गरिएको र आर्थिक वर्ष २०८१/८२ को वितरणयोग्य मुनाफाबाट हाल कायम चुक्ता पूँजी पाँच अर्ब तिन करोड बाह्र लाख बत्तीस हजारको ५ प्रतिशत बोनस शेयर र १५.२६३२ प्रतिशत नगद लाभांश (बोनस शेयरको कर प्रयोजनार्थ सहित) प्रदान गर्ने प्रस्ताव सर्वसम्मत पारित भएको छ। यसरी कुल लाभांश २०.२६३२ प्रतिशत निर्धारण गरिएको छ।

सभामा संचालक किरण के.सी.ले धन्यवाद ज्ञापन गरेका थिए भने सभा कम्पनी सचिव बिनोद शर्मा पौडेलले संचालन गरेका थिए।

कम्पनीले यस निर्णयमार्फत शेयरधनीलाई प्रतिफल वितरण गर्दै वित्तीय पारदर्शिता र स्थिरता कायम गर्ने प्रतिबद्धता व्यक्त गरेको छ।