काठमाडौँ। “सम्पत्ति शुद्धीकरण राष्ट्रिय निवारण दिवस” का अवसरमा नेपाल एसबिआई बैंक लिमिटेडले आफ्ना कर्मचारीहरूबाट सम्पत्ति शुद्धीकरण तथा आतङ्कवादी गतिविधिमा वित्तीय लगानी वा अन्य गैरकानुनी प्रयोजनका लागि बैंकिङ प्रणालीको दुरुपयोग हुन नदिन उच्चतम सतर्कता अपनाउने प्रतिज्ञा गराएको छ।

नेपाल सरकारले माघ १४ लाई राष्ट्रिय सम्पत्ति शुद्धीकरण निवारण दिवसका रूपमा मनाउने घोषणा गरेअनुसार बैंकले उक्त दिवस विशेष कार्यक्रमसहित मनाएको हो।

बैंकका प्रबन्ध सञ्चालक तथा प्रमुख कार्यकारी अधिकृत राम कुमार तिवारीले प्रधान कार्यालय, काठमाडौंमा आयोजित कार्यक्रममा सम्पूर्ण कर्मचारीहरूलाई प्रतिज्ञा गराउनुभएको थियो। कार्यक्रममा नायब प्रमुख कार्यकारी अधिकृत तथा प्रमुख सञ्चालन अधिकृत विकास आनन्द, प्रमुख वित्तीय अधिकृत राजेश कुमार पण्डा, प्रमुख व्यवसाय प्रवर्द्धन अधिकृत प्रविण मुनि बज्राचार्यलगायत वरिष्ठ पदाधिकारीहरूको उपस्थिति रहेको थियो।

त्यसैगरी बैंकका प्रदेश तथा शाखा कार्यालयका कर्मचारीहरूले पनि आ–आफ्ना कार्यालयहरूमा प्रतिज्ञा कार्यक्रम आयोजना गरेका थिए।

नेपाल एसबिआई बैंक लिमिटेडले विगत ३२ वर्षदेखि नेपालमा बैंकिङ सेवा प्रदान गर्दै आएको छ। हाल बैंकका १०२ शाखा, २२ एक्स्टेन्सन काउन्टर, ७ प्रादेशिक कार्यालय, २१ शाखारहित बैंकिङ सेवा केन्द्र, १२७ एटिएम र १ कर्पोरेट कार्यालय सञ्चालनमा छन्।