काठमाडौँ । कामना सेवा विकास बैंकले आफ्ना ग्राहक तथा कर्मचारीलाई लक्षित गर्दै काठमाडौंको बसुन्धारास्थित कान्तिपुर डेन्टल कलेज टिचिङ हस्पिटल एण्ड रिसर्च सेन्टरसँग सेवा शुल्कमा छुट सम्बन्धी सम्झौता गरेको छ।

सम्झौताअनुसार बैंकका ग्राहक र कर्मचारीहरूले अस्पतालले उपलब्ध गराउने विभिन्न दन्त उपचार तथा स्वास्थ्य सेवामा १५ प्रतिशतसम्म छुट प्राप्त गर्न सक्नेछन्। बैंकसँगको आबद्धता प्रमाणित गरेपछि उक्त सुविधा सहज रूपमा लिन सकिने व्यवस्था गरिएको बैंकले जनाएको छ।

बैंकका अनुसार यस सहकार्यले बैंकसँग आबद्ध ग्राहकहरूलाई गुणस्तरीय दन्त स्वास्थ्य सेवा किफायती दरमा उपलब्ध गराउने लक्ष्य राखिएको छ। छुट सुविधा अस्पतालका विभिन्न सेवा–सुविधामा लागू हुने जनाइएको छ।

सम्झौतापत्रमा बैंकका तर्फबाट काठमाडौं क्षेत्र प्रमुख केदारनाथ शर्मा तथा कान्तिपुर डेन्टल कलेज टिचिङ हस्पिटल एण्ड रिसर्च सेन्टरका सञ्चालक डा. प्रतिक्षा श्रेष्ठले हस्ताक्षर गरेका छन्।

बैंकले यस्ता सहकार्यहरूमार्फत आफ्ना ग्राहकलाई थप मूल्य अभिवृद्धि सेवा प्रदान गर्ने रणनीति अनुरूप स्वास्थ्य, शिक्षा लगायत विभिन्न क्षेत्रमा साझेदारी विस्तार गर्दै जाने जनाएको छ।