काठमाडौं — बेलायती प्रिमियम मोटरसाइकल ब्रान्ड ट्रायम्फ मोटरसाइकलले भारतमा १ लाख युनिट मोटरसाइकल बिक्री गर्दै महत्वपूर्ण माइलस्टोन हासिल गरेको छ। भारतमा उत्पादन र वितरणको जिम्मेवारी सम्हालिरहेको कम्पनी बजाज अटोले उक्त जानकारी सार्वजनिक गरेको हो।

सन् २०२३ को दोस्रो त्रैमासिकमा बजाज–ट्रायम्फ साझेदारी सुरु भएको करिब साढे दुई वर्षपछि कम्पनीले यो उपलब्धि हासिल गरेको हो। बजाज अटोका अनुसार यसले भारतीय बजारमा प्रिमियम मोटरसाइकल सेग्मेन्टमा ट्रायम्फको तीव्र विस्तारलाई देखाएको छ।

साझेदारी सुरु भएदेखि ट्रायम्फले बजाज अटोको उत्पादन क्षमता, अनुसन्धान तथा विकास (आर एन्ड डी) विशेषज्ञता र व्यापक वितरण सञ्जालको प्रयोग गर्दै भारतमा आफ्नो उपस्थिति उल्लेखनीय रूपमा विस्तार गरेको छ। हाल ट्रायम्फको उपस्थिती भारतका २०० भन्दा बढी शहरमा फैलिएको छ भने २३० भन्दा बढी डिलरशिप तथा स्टोरहरूको नेटवर्कमार्फत मोटरसाइकल बिक्री भइरहेको छ।

भारतमा उत्पादन हुने ट्रायम्फको ४०० सीसी लाइनअपले घरेलु बजारसँगै अन्तर्राष्ट्रिय बजारमा पनि राम्रो माग पाएको छ। हाल भारतमा निर्मित ट्रायम्फ मोटरसाइकल नेपालसहित जापान, अष्ट्रेलिया, मेक्सिको, ताइवान र दक्षिण कोरिया लगायत विश्वका १८ देशमा निर्यात हुँदै आएका छन्।

यसैबीच कम्पनीले भारतमा आफ्नो मोटरसाइकल पोर्टफोलियो थप विस्तार गर्ने तयारी पनि गरेको छ। बजाज अटोका प्रबन्ध निर्देशक तथा प्रमुख कार्यकारी अधिकृत राजीव बजाजका अनुसार आगामी अप्रिल महिनामा ट्रायम्फको ३५० सीसी मोटरसाइकलहरूको नयाँ रेन्ज सार्वजनिक गरिनेछ।

ट्रायम्फ नेपाली बजारमा पनि लोकप्रिय बन्दै गएको मोटरसाइकल ब्रान्ड हो। नेपालमा स्पिड ४००, स्क्र्याम्बलर ४०० एक्स र स्क्र्याम्बलर ४०० एक्ससी गरी तीन भेरियन्ट उपलब्ध छन्, जसको मूल्य क्रमशः ६ लाख ६० हजार, ७ लाख १५ हजार र ८ लाख रुपैयाँ रहेको छ।