रौतहट । रौतहटको सदरमुकाम गौरस्थित मालपोत कार्यालयमा सेवाग्राहीलाई अनावश्यक दुःख दिने र ठगी गर्ने कार्यमा संलग्न चार जना बिचौलियालाई प्रहरीले नियन्त्रणमा लिएको छ ।

जग्गा पास, बिक्री वा अन्य प्रशासनिक कामका लागि कार्यालय आउने सेवाग्राहीलाई छिटो काम गराइदिन्छु भन्दै प्रलोभनमा पारी रकम असुल्ने गरेको अभियोगमा उनीहरू पक्राउ परेका हुन् । जिल्ला प्रहरी कार्यालय गौरबाट खटिएको विशेष टोलीले उनीहरूलाई कार्यालय परिसर र आसपासको क्षेत्रबाट नियन्त्रणमा लिएको हो ।

मालपोत कार्यालय वरपर लामो समयदेखि सक्रिय बिचौलियाहरूले सर्वसाधारणलाई अनावश्यक झन्झट दिने र ठग्ने गरेको व्यापक गुनासो आएपछि प्रहरी सक्रिय बनेको हो । पक्राउ परेका व्यक्तिहरूलाई हाल जिल्ला प्रहरी कार्यालय गौरमा राखेर थप अनुसन्धान भइरहेको प्रहरी स्रोतले जनाएको छ ।

मालपोत कार्यालय क्षेत्रमा सक्रिय अन्य बिचौलियाहरूमा भने हडकम्प मच्चिएको छ । स्थानीय बासिन्दाहरूले प्रहरीको यस कार्यको स्वागत गर्दै यसबाट सीधा र सोझा सेवाग्राहीलाई ठूलो राहत मिल्ने विश्वास व्यक्त गरेका छन् ।

साथै, पक्राउ परेकाहरूमाथि कडा कानुनी कारबाही गर्न र यस्तो अभियानलाई निरन्तरता दिन स्थानीयले माग समेत गरेका छन् ।