काठमाडौँ। कला, फिल्म तथा साहित्य क्षेत्रमा अभिव्यक्ति स्वतन्त्रताको रक्षा गर्नुपर्ने मागसहित कलाकर्मीहरूले काठमाडौँको माइतीघर मण्डलामा शान्तिपूर्ण विरोध प्रदर्शन गरेका छन्। देशको सांस्कृतिक तथा सिर्जनात्मक क्षेत्रसँग सम्बन्धित विभिन्न विधाका कलाकारहरूको सहभागिता रहेको उक्त प्रदर्शनले पछिल्लो समय अभिव्यक्ति स्वतन्त्रतामाथि भइरहेको हस्तक्षेपप्रति चिन्ता व्यक्त गरेको छ।

प्रदर्शनमा सहभागी कलाकारहरूले कालो पट्टी बाँधेर प्रतीकात्मक रूपमा विरोध जनाएका थिए। उनीहरूले आफूहरूको सिर्जनात्मक अधिकार सुरक्षित हुनुपर्ने, कला र साहित्यलाई कुनै पनि प्रकारको नियन्त्रण वा दबाबमा राख्न नहुने माग गरेका छन्। कार्यक्रममा सहभागीहरूले “सिनेमा-साहित्य बोल्न देऊ—हाम्रो कथा खुल्न देऊ”, “हाम्रो कथा लुक्दैन—सिनेमा साहित्य रोकिन्न”, “संविधानले दिएको सम्मान हाम्रो अडान” जस्ता नारा लेखिएका प्लेकार्ड बोकेर आफ्नो असन्तुष्टि व्यक्त गरेका थिए।

कलाकर्मीहरूले नेपालको संविधानले प्रदान गरेको अभिव्यक्ति स्वतन्त्रताको हकलाई व्यवहारमा कार्यान्वयन गर्नुपर्नेमा जोड दिएका छन्। उनीहरूका अनुसार कला र साहित्य समाजको दर्पण मात्र नभई परिवर्तनको माध्यम पनि भएकाले यसलाई सीमित गर्ने प्रयासले लोकतान्त्रिक मूल्य मान्यतामाथि प्रश्न उठाउँछ।

प्रदर्शनमा सहभागी केही कलाकारहरूले राज्यका निकायहरू तथा सम्बन्धित सरोकारवालाहरूलाई सिर्जनात्मक क्षेत्रप्रति संवेदनशील बन्न आग्रह गरेका छन्। उनीहरूले सेन्सरशिप, आत्मसेन्सरशिप तथा अप्रत्यक्ष दबाबका कारण सर्जकहरू स्वतन्त्र रूपमा अभिव्यक्ति दिन नसक्ने अवस्था सिर्जना भइरहेको बताएका छन्।

कार्यक्रम शान्तिपूर्ण रूपमा सम्पन्न भएको थियो। आयोजकहरूले आगामी दिनमा पनि आवश्यक परे थप आन्दोलनका कार्यक्रम ल्याउने चेतावनी दिएका छन्। उनीहरूले कला, फिल्म र साहित्य क्षेत्रलाई स्वतन्त्र र निर्भीक बनाउन सामूहिक रूपमा आवाज उठाइरहने प्रतिबद्धता जनाएका छन्।