काठमाडौं । नेपाल जग्गा तथा आवास विकास महासंघ र नेपाल जग्गा तथा आवास विकास संघको संयुक्त आयोजनामा ‘९ औं नेपाल घरजग्गा तथा निर्माण प्रदर्शनी २०२६’ आगामी असोज १ देखि ४ गतेसम्म काठमाडौंस्थित भृकुटीमण्डपमा आयोजना हुने भएको छ ।

आयोजकले शनिबार पत्रकार सम्मेलनमार्फत प्रदर्शनीबारे जानकारी दिँदै ‘दिगोपनाका लागि हरियाली’ भन्ने मूल नारासहित आयोजना हुन लागेको मेलाले व्यवस्थित आवास, सुरक्षित घरजग्गा विकास तथा दिगो शहरीकरणलाई प्रवद्र्धन गर्ने जनाएको छ ।

नेपाल चेम्बर अफ कमर्सको ७५ औँ हिरक जयन्तीको अवसर पारेर आयोजना गर्न लागिएको प्रदर्शनीको व्यवस्थापन सिया इभेन्ट एसोसिएट्स प्रालिले गर्नेछ । यसअघि नेपाल जग्गा तथा आवास विकास संघले यस्ता आठ वटा प्रदर्शनी सफलतापूर्वक आयोजना गरिसकेको छ ।

आयोजकका अनुसार नेपालको संविधानले आवासको हकलाई मौलिक हकका रूपमा सुनिश्चित गरेकाले वैज्ञानिक, किफायती, सुरक्षित तथा व्यवस्थित आवास विकासका विषयमा जनचेतना अभिवृद्धि गर्न प्रदर्शनी उपयोगी हुने अपेक्षा गरिएको छ । प्रदर्शनीले रियल इस्टेट व्यवसायी र उपभोक्तालाई एकै स्थानमा ल्याई घरजग्गा तथा आवाससम्बन्धी सही सूचना, नवीनतम् प्रविधि तथा लगानीका अवसरबारे जानकारी प्रदान गर्नेछ ।

मेलामा भवन, अपार्टमेन्ट तथा जग्गा विकास आयोजना, निर्माण सामग्री, विद्युतीय उपकरण, आधुनिक फर्निचर, सेनिटरी वेयर्स, पेन्ट, सेरामिक, काठ तथा ढुंगाजन्य सामग्री, इन्टेरियर डेकोर, वास्तुकला, भर्चुअल र अग्मेन्टेड रियालिटी प्रविधि, सौर्य ऊर्जा तथा आधुनिक फोहोर व्यवस्थापन प्रणालीलगायतका सामग्री र सेवाहरू प्रदर्शन गरिनेछन् ।

त्यसैगरी बैंक तथा बीमा कम्पनी, इन्जिनियरिङ तथा आर्किटेक्चर कन्सल्ट्यान्ट, रियल इस्टेट एजेन्ट, निर्माण सामग्री उत्पादक तथा आपूर्तिकर्तासहित स्वदेशी तथा विदेशी गरी १०० भन्दा बढी स्टल रहने आयोजकले जनाएको छ । मेलामा विभिन्न क्षेत्रका विज्ञहरूले उपभोक्तालाई प्रत्यक्ष परामर्श सेवा पनि उपलब्ध गराउनेछन् ।

आयोजकका अनुसार इच्छुक कम्पनीहरूले मेला अवधिमै आफ्ना नयाँ उत्पादन तथा सेवाको औपचारिक शुभारम्भ (प्रोडक्ट लञ्च) गर्न सक्ने व्यवस्था समेत मिलाइनेछ । प्रदर्शनी घरजग्गा व्यवसायी, लगानीकर्ता, घर तथा जग्गा खरिदकर्ता, इन्जिनियर, आर्किटेक्ट, शहरी योजनाकार, इन्टेरियर डिजाइनर, निर्माण सामग्री विक्रेता तथा अन्य सेवा प्रदायकहरूका लागि साझा मञ्च बन्ने विश्वास गरिएको छ । साथै, सम्बन्धित सरकारी निकाय, मन्त्रालय, विभाग तथा स्थानीय तहका प्रतिनिधिको सहभागिताले नीतिगत समस्या समाधान र सार्वजनिक–निजी साझेदारी सुदृढ गर्न सहयोग पुग्ने अपेक्षा गरिएको छ ।

हाल देखिएको आर्थिक शिथिलताका बीच प्रदर्शनीले उपभोक्तालाई घरजग्गा तथा आवाससम्बन्धी कारोबारलाई थप पारदर्शी, व्यवस्थित र सहज बनाउन सहयोग गर्ने आयोजकको दाबी छ । बैंकिङ क्षेत्रमा बढ्दो तरलता र घट्दो ब्याजदरको अवस्थामा उपभोक्तालाई सुरक्षित लगानी र उपयुक्त वित्तीय निर्णयतर्फ प्रेरित गर्ने विश्वास पनि व्यक्त गरिएको छ ।