काठमाडौं। नेपाल बैंक लिमिटेड र ॐ समाज डेन्टल हस्पिटल प्रालिबीच बैंकका ग्राहक तथा कर्मचारीलाई दन्त उपचार सेवामा विशेष छुट प्रदान गर्ने सम्झौता भएको छ।

सम्झौताअनुसार नेपाल बैंकमा खाता भएका ग्राहक तथा बैंकका कर्मचारीले काठमाडौंको चावहिल, नैकाप, वनस्थली, सातदोबाटो तथा महोत्तरीको बर्दिवासस्थित ॐ समाज डेन्टल हस्पिटलमा उपचार गराउँदा विभिन्न सेवामा छुट पाउनेछन्।

सम्झौताबमोजिम अस्पतालमा बिरामी दर्ता तथा चेकअप सेवामा शतप्रतिशत छुट उपलब्ध हुनेछ भने अस्पतालले प्रदान गर्ने अन्य विभिन्न सेवामा १५ देखि २५ प्रतिशतसम्म शुल्क छुट दिइने जनाइएको छ।

सम्झौतापत्रमा नेपाल बैंकका तर्फबाट सहायक प्रमुख कार्यकारी अधिकृत दीपेन्द्रराज काफ्ले र ॐ समाज डेन्टल हस्पिटल प्रालिका प्रमुख प्रशासकीय अधिकृत बिजेन्द्र लालले हस्ताक्षर गरेका हुन्।

नेपाल बैंकले यस सम्झौताबाट आफ्ना ग्राहक तथा कर्मचारीले दन्त तथा मुखसम्बन्धी उच्चस्तरीय उपचार सेवामा सहज पहुँच पाउने विश्वास व्यक्त गरेको छ।

नेपालको पहिलो बैंकका रूपमा परिचित नेपाल बैंकले हाल देशभर २३१ शाखा, २४६ एटीएम तथा ५८ एक्सटेन्सन काउन्टरमार्फत करिब २७ लाख ग्राहकलाई वित्तीय सेवा प्रदान गर्दै आएको जनाएको छ। बैंकले आधुनिक बैंकिङ प्रविधिको प्रयोगमार्फत ग्राहक केन्द्रित सेवा विस्तारलाई निरन्तरता दिँदै आएको छ।