ताइपेईविरुद्धको खेल प्रतिस्पर्धात्मक हुने नेपाली फुटबल टिमका कप्तान चेम्जोङको दाबी
Monday Sep 09, 2019
वि.सं.२०७६ भदौ २३ सोमवार ११:४९
काठमाडौं, भदौ २३ । फिफा विश्वकप २०२२ को छनोट अन्तर्गतको पहिलो खेलमा कुवेतसँग ७–० ले पराजित भएको नेपालले भोलि (मंगलबार) चाइनिज ताइपेईसँग प्रतिस्पर्धा गर्दैछ ।
नेपाली टिमका कप्तान तथा गोलरक्षक किरण चेम्जोङले चाइनिज ताइपेईविरुद्धको खेल प्रतिस्पर्धात्मक हुने बताए । प्रिम्याच कन्फ्रेन्समा सोमबार किरणले नेपाली टिमले उत्कृष्ट फुटबल खेल्ने बताएका हुन।
चाइनिज ताइपईसँग गत जुनमा भएको प्रतिस्पर्धामा एक–एक गोलको बराबरी खेलेको थियो । कुवेतसँग नमिठो पराजय भोगेपछि नेपाली टिमले ताइपेईविरुद्धको खेल अघि तयारी भने धेरै गर्न पाएको छैन् ।
कुवेतबाट नेपाल आएको टिम त्यही दिन नै ताइपेई प्रस्थान गरेको थियो । कप्तान किरणले यो प्रतियोगिताका लागि नेपाली टिमले तयारी गर्न नपाए पनि मंगलबारको खेल उत्कृष्ट हुने विश्वास व्यक्त गरे ।
दुवै टिमले पहिलो खेलमा पराजय व्यहोरेकाले मंगलाबार स्पष्ट तीन अंक लिने प्रयासमा हुने छन् । ताइपेई पहिलो खेलमा जोर्डनसँग पराजित भएको थियो ।
नेपाल र चाइनीज ताइपेईबीचको खेल भोलि ४ः५५ बजे ताइपेई म्युनिसिपल स्टेडियममा सुरु हुने छ ।
