कोरोना कहरका कारण सबैभन्दा प्रताडित छन् फ्रन्टलाइनमा खटिएकाहरु । स्वास्थ्यकर्मी,सुरक्षाकर्मीहरुदेखि बैंकरहरुसमेत कोरोना संक्रमणको उच्च जोखिममा छन् । स्वास्थ्य मन्त्रालयको पछिल्लो तथ्यांक अनुसार नेपालमा हिजोसम्ममा संक्रमितहरुको संख्या ८६ हजार ८२३ जना रहेको छ । जसमध्ये उपचारपछि ६४ हजार ६९ जना निको भएर घर फर्किएका छन् । कोरोनाकै कारण हालसम्म नेपालमा ५३५ जनाले ज्यान गुमाइसकेका छन् ।
जसमध्ये सबैभन्दा धेरै चाहिँ सुरक्षाकर्मीहरु छन् । फ्रण्टलाइनमा खटिँदै आएका सुरक्षा निकायका ८ हजार २ सय ६० जनामा संक्रमण पुष्टि भैसकेको छ ।

नेपाली सेना, नेपाल प्रहरी र सशस्त्र प्रहरी बलका सुरक्षाकर्मीहरुमा संक्रमण देखिएको हो । संक्रमितमध्ये सबैभन्दा बढी नेपाल प्रहरीका मात्रै ४ हजार ४ सय २३ जना छन् । तीमध्ये १ हजार ७ सय २६ जना सक्रिय संक्रमित छन् भने २ हजार ६ सय ९७ जना डिस्चार्ज भैसकेका छन् । यस्तै नेपाली सेनाका २ हजार ५ सय ९० जनालाई कोरोना संक्रमण देखिएको छ । जसमध्ये ८ सय ८ जना डिस्चार्ज भएका छन् भने १ हजार ८ सय ८० जना सक्रिय संक्रमित छन् । संक्रमणबाट सेनाका २ जनाको मृत्यु भएको छ । सशस्त्र प्रहरी बलमा भने निको हुने दर बढेको छ । सशस्त्रमा १ हजार २ सय ४७ जना संक्रमित हुँदा ९ सय ९९ जना डिस्चार्ज भएका छन् । २ सय ४८ जना सक्रिय संक्रमित छन् ।

प्रहरी प्रधान कार्यालयकै ३ सय १ जना, उपत्यकाका ५ सय ९७ जना, प्रदेश १ का १ सय ४३ जना, प्रदेश २ का ८४ जना, बागमती प्रदेशका १ सय ३४ जना, गण्डकी प्रदेशका १ सय ३४ जना, प्रदेश ५ का १ सय ७६ जना, कर्णाली प्रदेशका ४१ जना र सुदूरपश्चिम प्रदेशका ९५ जना सक्रिय संक्रमित छन् । यस्तै स्वास्थकर्मीहरुमा पनि संक्रमण बढ्दो छ ।
यस्तै ठाउँहरुमध्ये बैंकहरुमा पनि कोरोनाको जोखिम बढिरहेको कुुरा दिनहुँ दर्जनौंको संख्यामा बैंकका कर्मचारी संक्रमित भएबाट पुष्टि हुन्छ । अहिले ग्लोबल आइमएमई बैंकका अध्यक्ष चन्द्र ढकालदेखि कोरोना संक्रमणमा परेका छन् । बैंकर एशोसिएसनका अध्यक्ष तथा सानिमा बैंकका प्रमुख कार्यकारी अधिकृत भूवन दाहाल समेत घरमै बसेर काम गरिरहेका छन् । राष्ट्रबैंकको बैंक तथा वित्तीय संस्था नियमन विभागका कार्यकारी निर्देशक देवकुमार ढकालका अनुसार सोमबारसम्मको तथ्याङ्कअनुसार देशभरका २ हजार ९०० बैंक कर्मचारी र उनका परिवार कोरोनाबाट संक्रमित भइसकेका छन् । संक्रमितमध्ये सबैभन्दा ठूलो संख्या वाणिज्य बैंकका कर्मचारी र तिनका परिवार रहेका छन् । वाणिज्य बैंकमा काम गर्ने २४०० कर्मचारी र तिनका परिवार हालसम्म कोरोना संक्रमित भइसकेका छन् ।

यस्तै, विकास बैंकका ४०० र बित्त कम्पनीका १०० कर्मचारीलाई कोरोना भएको छ ।