काठमाडौं। महिला लघुवित्तले निष्काशन गरेको आईपीओ बाँडफाँड भएको छ । बिक्रि प्रबन्धक नेपाल एसबिआई मर्चेन्टले शुक्रबार बिहान ८ बजे आईपीओ बाँडफाँड गरेको हो ।

कम्पनीको आईपीओ ३७ हजार ५ सय जना आवेदकले १० कित्ताको दरले प्राप्त गरेका छन् । कम्पनीले सर्व साधारणका लागि ३ लाख ७५ हजार कित्ता शेयर निष्कासन गरेको थियो ।

जसमा १५ लाख ४० हजार ३५ जनाले आवेदन दिएकोमा ३ हजार ३ सय ५३ जनाको आवेदन रद्द भएको क्यापिटलले जनाएको छ । योग्य कायम रहेका १५ लाख ३६ हजार ६ सय ८२ जनालाई गोलाप्रथामा समावेश गराई शेयर बाँडफाँड गरिएको हो । आवेदन दिएकामध्ये १५ लाख २ हजार ५ सय ३५ जनाको हात खाली भएको छ ।

कम्पनीले माघ ३० गतेदेखि ४ करोड रुपैयाँ बराबरको ४ लाख कित्ता शेयर निष्काशन गरेको हो । जसमध्ये ५ हजार कित्ता कम्पनीका कर्मचारीहरुलाई र २० हजार कित्ता सामुहिक लगानी कोषहरुलाई छुट्याएको थियो। बाँकि ३ लाख ७५ हजार कित्ताको लागि सर्वसाधारणमा बाँडफाँड गरिएको हो। आईपीओ निष्काशनपछि कम्पनीको चुक्ता पुँजी १० करोड पुगेको छ ।

लगानीकर्ताहरुले आईपीओको नतिजा हेर्न भने सकस झेल्नुपर्ने भएको छ । संचार माध्यमहरुलाई नतिजा नदिने निर्णयले सिमित ठाँउबाट मात्र रिजल्ट हेर्दा समयमै नतिजा थाहा पाउन मुस्किल पर्नेछ । लगानीकर्ताले आईपीओ जारी गर्ने कम्पनीको वेबसाइट, बिक्रि प्रबन्धकको वेबसाइट र सिडीएससीको मेरो शेयर मार्फत मात्र नतिजा हेर्न सक्नेछन् । तर मेरोशेयर वेबसाइटमा बारम्बार समस्या आउने गरेको छ । अनलाइन मिडियामा नतिजा हेर्न नपाउँदा लगानीकर्ताहरु समयमै नतिजा थाहा पाउनबाट भने बन्चित हुने देखिन्छ ।