पूर्वराजा ज्ञानेन्द्रवीर बिक्रम शाह २०७५ को असोज महिना पनि विदेशमै रमाउने कार्यक्रम रहेको थाहा भएको छ । उनका ती भ्रमणहरु राजनीतिकदेखि पारिवारिक र पर्यटकीयसम्म हुनेछन् । देशदेशावरको यात्रामा निस्केका ज्ञानेन्द्र शाह अहिले श्रीलंकाको राजनीतिक भ्रमणमा ब्यस्त छन् ।

२०७५ भदौ २९ गतेबाट थाइलैण्ड भ्रमणमा निस्केका शाह एक महिना पुरै विदेशमा विताउने छन् । २९ भदौमा विदेश भ्रमणमा निस्केका पूर्वराजा शाह ३० असोजमा नेपाल आइपुग्नेछन् । यो समयमा उनी थाईलैण्ड, श्रीलंका, भारतदेखि माल्दिभ्ससम्मको यात्रा गर्नेछन् ।

२९ भदौमा थाइलैण्ड निस्केका पूर्व राजा शाहको परिवारले त्यहाँ शुद्ध पारिवारिक भ्रमण सम्पन्न गरेका छन् । पूर्व अधिराजकुमारी हिमानी शाहका छोरीहरु पूर्णिका र कृतिकासँगको भेटघाट गरेपछि पूर्व राजपरिवारको टोली अहिले श्रीलंका पुगेको छ ।

५ असोजबाट सुरु भएको श्रीलंका भ्रमण २० असोजसम्म हुनेछ । १५ दिन लामो यो भ्रमण भने राजनीतिक हुनेछ ।

स्रोतका अनुसार, श्रीलंकामा पूर्व महाराज ज्ञानेन्द्र शाहले भारतीय, चिनियालगायतका सार्क र सार्क बाहिरका देशमा राजनीतिक व्यक्तिहरुसँग महत्वपूर्ण भेटघाट र वार्ता गर्नेछन् । त्यो भेटघाट के उद्देश्यका लागि हुनेछ भनेर नखुले पनि भेटवार्ता भने निकै महत्वपूर्ण हुने स्रोतहरुको भनाइ छ ।

श्रीलंकापछि पूर्व राजाको भ्रमण माल्दिभ्स हुनेछ । मादिभ्सको यात्रा भने शाह परिवारको घुमघामका लागि मात्रै हुनेछ । अहिलेसम्म पूर्व राजा र उनको परिवार माल्दिभ्स गएको छैन ।

२७ असोजसम्म माल्दिभ्समा रहने यो टोलीले २७ असोजमा भनेर भारतको मुम्बई पुग्नेछ । मुम्बईमा हुने महायज्ञमा निमन्त्रणा मान्न पुग्ने राजपरिवार बडादशैं २०७५ को फूलपातीका दिन ३० असोजमात्रै नेपाल फर्किने कार्यक्रम रहेको छ ।

स्रोतका अनुसार, पूर्वराजा शाहको भ्रमण दलमा पूर्व महारानी कोमल, वुहारी हिमानी हुनेछन् । साथै, पूर्वराजा ज्ञानेन्द्रका सहयोगी सागर तिमिल्सना, पुराना मित्र प्रभु शमशेर राणा, हिमानीका सहयोगी स्मिता सिंह त्यसैगरी, हस्तबहादुर मल्ल अनि भान्से, सुसारे र नानीहरुको टोली पनि साथमै रहेको छ ।