काठमाडौं । नेपाल पुनर्बीमा कम्पनीले अघिल्लो आर्थिक वर्ष ०७७/७८ को लाभांश पारित गरेको छ । कम्पनीले बिहीवार सातौं वार्षिक साधारण सभा सम्पन्न गर्दै प्रस्तावित कुल ५ दशमलव २६ प्रतिशत लाभांश पारित गरेको हो ।

यस वर्ष कम्पनीले हाल कायम चुक्तापूँजी रू. ११ अर्ब ६५ करोडको आधारमा ५ प्रतिशत बोनस शेयर र कर प्रयोजनका लागि शून्य दशमलव २६ प्रतिशत नगद लाभांश वितरण गर्न लागेको हो । बोनस शेयर वितरणपछि कम्पनीको चुक्तापूँजी रू. १२ अर्ब २३ करोड २५ लाख कायम हुनेछ ।

सभाले लाभांश प्रस्तावसँगै अघिल्लो आर्थिक वर्षसम्मको वार्षिक प्रतिवेदन सहितका वित्तीय विवरणहरू पारित गर्दै गत आर्थिक वर्ष ०७८/७९ को लागि वार्षिक लेखापरिक्षणका लागि टि.आर उपाध्याय एण्ड कम्नपी, चार्टड एकाउन्टेन्ट्स, बानेश्वर, काठमाडौंलाई नियुक्त गर्ने निर्णय समेत गरेको छ । कम्पनीले साधारण सभा र लाभांश प्रयोजनकाल लागि भदौ १९ गते आइतवार एक दिन बुक क्लोज गरेको छ । बुक क्लोजको आधारमा भदौ १७ गते शुक्रवारसम्म कायम शेयरधनीहरूले मात्र कम्पनीको लाभांश प्राप्त गर्नेछन् ।

कम्पनीले आर्थिक वर्ष ०७६/७७ सम्मको सञ्चित मुनाफबाट कुल १९ प्रतिशत लाभांश वितरण गरेको थियो । उक्त वर्ष १६ दशमलव ५ प्रतिशत बोनस शेयर र कर प्रयोजन समेतका लागि कम्पनीले २ दशमलव ५ प्रतिशत नगद लाभांश वितरण गरेको हो । लगानीकर्ताहरूले अघिल्लो वर्षभन्दा गत वर्षको लाभांश कम भएकोमा सभा मार्फत गुनासो गरेका छन् । नेपालकै पहिलो पुनर्बीमा कम्पनीको पहिचान काय राखी शेयरधनीहरूको लागि समेत आकर्षक प्रतिफल वितरण गर्ने क्षमतामा कम्पनीलाई अघि बढाउन लगानीकर्ताहरूले सुझाब समेत दिएका छन् ।