काठमाडौंको भृकुटीमण्डपमा अन्तर्राष्ट्रिय ऊर्जा र विद्युत्सँग सम्बन्धित प्रदर्शनी हुने भएको छ । मिडिया स्पेस सोलुसन्स (एमएसएस)का साथै एक्जिबिसन एन्ड ट्रेड सर्भिसेस इन्डिया प्रालि (इटिएसआइपिएल) तथा फ्युचरेक्स ट्रेड फेयर्स एन्ड इभेन्ट्स प्रालिको संयोजकत्वमा माघ ६ देखि ८ सम्म भृकुटीमण्डपमा ‘नेपाल इलेक्ट्रिक पावर लाइट्स अन्तर्राष्ट्रिय प्रदर्शनी’ नामक विद्युतीय र ऊर्जासँग सम्बन्धित प्रदर्शनी हुन लागेको हो ।

प्रदर्शनीमा स्वदेशी तथा विदेशी गरी एक सयभन्दा बढी कम्पनीहरूको स्टल रहने आयोजकले जनाएका छन् । प्रदर्शनीले आधारभूत रूपमा प्रदर्शनी, सम्मेलन र साझेदारीको समायोजन गर्न खोजेको आयोजकको दाबी छ । यी तीन सोचहरूबाट नेपालमा विद्युत् तथा ऊर्जासँग आबद्ध विभिन्न उद्योगहरूले आपसी साझेदारी गर्ने, सम्बन्ध बढाउने तथा व्यवसायका अवसरहरू निर्माण गर्ने केन्द्रको भूमिका निर्वाह गर्ने जनाइएको छ ।

नेपालमा इलेक्ट्रोनिक्स क्षेत्रको राजस्व सन् २०२२ मा अमेरिकी डलर ३६ करोड पुग्ने प्रक्षेपण गरिएको थियो । त्यस्तै, इलेक्ट्रोनिक्स क्षेत्रमा सन् २०२७ सम्ममा प्रयोगकर्ताको संख्य्या एक करोड ३९ लाख पुग्ने अपेक्षा गरिएको छ । नेपालमा आयात हुने करिब ६० प्रतिशत इलेक्ट्रोनिक तथा विद्युतीय उपकरण भारतबाट आउने भएका कारण यो प्रदर्शनीमा भारतीय उपमहाद्वीप (भारत वर्ष)का सरोकारवालाको सहभागिता उल्लेखनीय हुने आयोजकले जनाएका छन् ।

प्रदर्शनीमा आगन्तुकलाई प्रवेश निःशुल्क गराइनुका साथै विद्युत्, विद्युतीय उपकरण र बत्तीसँग सम्बन्धित क्षेत्रहरूमा प्राविधिक सामग्री र ज्ञान साझेदारी निर्माण गर्ने उद्देश्यसहितको सम्मेलनका कार्यक्रम पनि गराइने आयोजकको भनाइ छ ।