काठमाडौं । गैर आवासीय नेपाली संघका अध्यक्ष बद्री केसीले संसारभरि तीव्र रुपमा फैलिएको परिवार नियोजनको कार्यहरु रोक्न आवश्यक रहेको टिप्पणी गरेका छन् ।

शुक्रवार काठमाडौंमा आयोजित गैर आवासीय नेपाली संघको पत्रकार सम्मेलनमा बोल्दै उनले जनसंख्या बढेसंगै देशमा विकास पनि बढ्ने हुँदा त्यसैको लागि भएपनि परिवार नियोजनको कार्य रोक्नु पर्ने बताएका हुन् ।

उनले भने,‘ आजको जमानामा नागरिक भनेको योग्यता होइन । अव त म भन्छु परिवार नियोजनको कार्यलाई संसार भरीबाट नै बन्ध गर्नुपर्छ । किनकि जहाँ बढी जनसङ्ख्या छ त्यही देशको मानिसहरूले धेरै विकास गरिरहेका छन् ।’

उनले नागरिकताको निरन्तरतालाई पनि पूर्ण अधिकार सहितको नागरिकताको लागि अभियान अगाडि बढाउनु पर्नेमा जोड दिए ।
विदेश बाट नेपाल आउन चाहनेलाई बाटो बन्ध गर्ने होइन पूर्ण अधिकारसहितको नागरिकता दिलाउनु पर्ने उनको भनाई छ ।

उनले भने‘अहिले हामीले गैर आवासीय नेपाली नागरिकता भनिएता पनि नागरिकताको निरन्तरतालाई पनि पूर्ण अधिकार सहितको नागरीकता पाएको छैन हामीले हाम्रा नागरिकलाई विदेश बाट आउँछु भन्नेलाई बाटो बन्द गर्ने होइन उहाँहरुलाई पूर्ण अधिकार सहितको नागरिकता दिनको लागि संघको कार्यक्रम निरन्तर चलाउने छौं ।’

अध्यक्ष केसीले राजनीतिक परिवर्तन आउँदा विदेशीले पाउँने नागरिकता कथा मात्र हो की ? भन्ने अन्यौलमा नरहनको लागि पनि आग्रह गरे ।