काठमाडौं । मिटरब्याज पीडित र सरकारी टोलीबीचको वार्ता निश्कर्ष विहिन भएको छ ।
रन्तपार्कको शान्तिवाटिकास्थित फल्चामा आइतबार अपरान्ह भएको वार्तामा मिटरब्याज पीडितले सरकारी वार्ता टोलीलाई ६ बुँदे मागपत्र बुझाएको छ । आजको वार्ता १५ मिनेटमै सकिएको छ । मिटरब्याज पीडितको वार्ता टोली १९ जनाको भएको भन्दै सानो बनाउन सरकारी वार्ता टोलीले आग्रह गरेपछि आजको वार्ता सामान्य औपचारिकतमा मात्रै सिमित भएको सरकारी वार्ता टोलीका सदस्य तथा गृहमन्त्रालयका सूचना अधिकारी उपसचिव दिल कुमार तामाङले जानकारी दिए ।

उनले भने ‘आजको इन्टरडक्टरी जस्तो भयो । परिचय दियौं । ठुलो वार्ता टोली बनाउनु भएको रहेछ १९ सदस्यीय । उहाँहरुसँग परिचय भयो । उहाँहरुले ६ बुदे माग सहितको पत्र बुझाउनु भयो । र अब भोली विहान १० बजे गृहमन्त्रालयमै छलफल गर्ने गरी आजको वार्ता टुङ्ग्यायौं । ’

सरकारले भने गृह मन्त्रालयका सहसचिव प्रदीप कोइरालाको संयोजकत्वमा टोली बनाएको छ । सरकारी वार्ता टोलीमा गृह मन्त्रालयका सहसचिव तथा प्रवक्ता जितेन्द्र बस्नेत, उपसचिव दिलकुमार तामाङ, प्रधानमन्त्री कार्यालयका उपसचिव उमाकान्त अधिकारी, कानुन मन्त्रालयका उपसचिव जंगबहादुर डाँगी र प्रहरी उपरीक्षक दिनेशराज मैनाली छन् । सरकासँग वार्ता गर्न मिटरब्याज तथा ठगीविरुद्ध किसान मजदुर संघर्ष समितिले अध्यक्ष अवधेश कुशवाहको नेतृत्वमा १९ सदस्यीय टोली बनाएको छ ।