काठमाडौं । कृषि, सहकारी तथा प्राकृतिक स्रोत समितिले कृषि मन्त्रालयबाट सिँचाई र जलश्रोत हटाउन लागिएको भन्दै सभामुखको ध्यानाकर्षण गराएको छ ।

 

आज सिंहदरबारस्थित सभामुखको कार्यकक्षमा पुगेर समितिले यसअघि कृषि तथा सिँचाईलाई एउटै समितिमा समेटिएको भएपनि पछिल्लो नियमावलीमा फरक व्यवस्था राखिएको भन्दै ध्यानाकर्षण गराएको हो ।

 

समिति सभापति अम्मर बहादुर थापाले पहिल्यैदेखि सिचाँई र जलश्रोत मन्त्रालय कृषि समितिमा भएपछि अहिले हटाएको पाइएकाले ध्यानाकर्षण गराइएको बताए ।

 

‘पहिल्यैदेखि सिचाँई र जलश्रोत मन्त्रालय कृषि समितिमा थियो । अहिलेको नियमावलीमा त्यो कटअफ भएछ । कृषिसंग सिचाँई भएन भने ।’ उनले भने ‘यी दुइटाको त एकदमै अन्योन्याश्रीत सम्बन्ध छ । त्यो सम्बन्ध भाको हुनाले कृषि मन्त्रालय भित्र सिचाँई आउनु प¥यो भनेर हामीले अनुुरोध ग¥यौं ।’

 

त्यस्तै उनले समितिले उठाएको विषयलाई सभामुखले पनि गम्भिर रुपमा लिनुभएको बताए । उनले नियमावलीमा भएको व्यवस्था तुरुन्तै हटाउन सक्ने अवस्था नभएपनि सभामुखले आवश्यक विधिबाट त्यसलाई सम्बोधन गर्ने वचन दिएको जानकारी दिए ।

त्यसअघि आजै बसेको समितिको बैठकमा कृषि मन्त्रालयसंग अन्योन्याश्रित सम्बन्ध भएका सिंचाई र जलश्रोत छुट्याउन नहुने विषयमा छलफल भएको थियो ।