२८ बैशाख, काठमाण्डौँ । नायिका रेखा थापापछि नेपाली फिल्मकी नम्बर वान नायिकाको ट्याग पाएकी प्रियंका कार्की अहिले गएको बर्ष रिलिज भएको फिल्म ‘छक्का पन्जा’ को सिक्वेल ‘छक्का पन्जा २’ को छायांकनमा व्यस्त छिन् । ‘छक्का पन्जा २’ को शुभमुहूर्त समारोहमा उपस्थित नभएकी प्रियंकाले यो फिल्ममा नायिका स्वस्तिमा खड्काकी आमाको भूमिका निर्वाहा गर्दैछिन् ।

छक्का पन्जामा दीपकराज गिरीसँग विवाहको नाटक गरेर अन्तिममा शिवहरी पौडेलकी श्रीमती बनेकी प्रियंकाले ‘छक्का पन्जा २’ मा छोरी स्वस्तिमालाई जन्मदिएकी छिन् । निर्माणपक्षले यस विषयमा आधिकारीक जानकारी नदिएपनि शिवहरी पौडेल र प्रियंका कार्की ‘छक्का पन्जा २’ मा स्वस्तिमाको आमा-बुबाको भूमिकामा देखिँदैछन् ।

स्वस्तिमाकी आमा बनेपछि प्रियंकाको लुक्स कस्तो भयो होला ? सायद तपाईहरु पनि हेर्न आतुर हुनुहुन्छ । फिल्मीखबर डटकमलाई प्रियंका कार्कीको दुई तश्वीर प्राप्त भएको छ, जुन तश्वीरमा प्रियंका निकै साधारण महिलाको रुपमा देखिएकी छिन् । यो तश्वीर प्रियंका ‘छक्का पन्जा २’ मा स्वस्तिमाकी आमा बनेपछिको हो ।
असोज ११ गतेलाई रिलिज डेट फाइनल गरिएको यो फिल्मलाई दोस्रो पटक हास्यकलाकार दीपाश्री निरौलाले निर्देशन गरेकी हुन् । फिल्मका कार्यकारी निर्माता विकास आचार्य हुन् । पहिलो भागमा नदेखिएका स्वस्तिमा खड्का र स्वरूपपुरुष ढकाल यो फिल्मको लिड कलाकारको रुपमा रहेका छन् ।

फिल्ममा दीपकराज गिरी, केदार घिमिरे, जितु नेपाल, शिवहरी पौडेल, वुद्धि तामाङ, प्रियंका कार्की, किरण केसी, बर्षा राउत, निश्चल बस्नेत लगायतका कलाकारहरुको पनि मुख्य  भूमिका रहेको छ । फिल्मको पटकथा तथा संवाद दीपकराज गिरी, केदार घिमिरे, जितु नेपाल र अभिमन्यू निरवीले लेखेका हुन् । दीपक-दीपाको प्रस्तुतीमा तयार हुन लागेको यो फिल्ममा जीतु नेपाल, माग्ने बुढो डट कम, ताराचन्द्र चापागाँई, सुमन गिरीको लगानी रहेको छ ।