७ जेठ, काठमाडौँ – पछिल्लो पटक ‘फन्को’ मा स्क्रिन सेयर गरेका सौगात मल्ल र प्रियंका कार्की यति बेला ‘फाटेको जुत्ता’ मा जोडीको रूपमा देखिने भएका छन् । ‘चपली हाइट’ फेम निर्माता अर्जुन कुमारको निर्माण रहने उक्त फिल्ममा आर्यन र प्रियंकाको जुगलबन्दीमा बुद्धि तामाङ, कामेश्वर चौरासिया, रवीन्द्र झालगायतले अभिनयमा साथ दिनेछन् । निकेश खडकाले निर्देशन गर्ने फिल्मको छायांकन आइतबार वीरगन्जमा थालिनेछ ।
दुई देशबीचको सीमा क्षेत्रमा हुने अपराध घटनालाई कमेडी जानरामा व्यक्त गर्न खोजिएको ‘फाटेको जुत्ता’ यसै वर्षको कात्तिक १७ मा रिलिज गर्ने योजनासहित छायांकनमा जान लागेको फिल्मका संगीतकारसमेत रहेका अर्जुनले बताए । सौगात र प्रियंकाले यसअघि ‘षडङ्ग’, ‘श्री ५ अम्बरे’ वा ‘फन्को’ मा स्क्रिन सेयर गरे पनि जोडीका रूपमा भने देखिएका थिएनन्, जति प्रियंकाले दयाहाङ राईसँग एकपछि अर्को गरी थुप्रै फिल्ममा काम गरेकी थिइन् । पछिल्लो समय प्रियंका र दयाहाङबीच मनमुटाव रहेको चर्चा चलिरहँदा ‘फाटेको जुत्ता’ ले नयाँ जोडी बाँधिदिएको हो ।

बिहीबार ललितपुरको कार्यविनायक मन्दिरमा आयोजित मुहूर्त कार्यक्रममा पनि दुवैले एकअर्कासँग काम गर्न पाउँदाको खुसी साटेका थिए ।