१८ जेठ, काठमाडौं- तीन पटक मिति सारिएको दोस्रो चरणको स्थानीय तह चुनावका लागि निर्वाचन आयोगले नयाँ निर्वाचन कार्यक्रम प्रकाशित गरेको छ । सरकारले असार ९ गतेका लागि तय गरेको निर्वाचन असार १४ गते सार्ने बुधवार निर्णय गरेपछि आयोगको बुधवारै बसेको बैठकले नयाँ निर्वाचन कार्यक्रम तय गरेको हो ।

स्थानीय चुनाव हुन बाँकी रहेका प्रदेश नं १, २, ५ र ७ का ४ सय ६१ स्थानीय तहमा आगामी असार २ गते उम्मेदवारको मनोनयन दर्ता गर्ने कार्यक्रम तोकिएको छ । असार ५ गते उम्मेदवारलाई निर्वाचन चिह्न प्रदान गर्ने र असार १४ गते बुधबार बिहान ७ बजेदेखि अपराह्न ५ बजेसम्म मतदान कार्यक्रम सञ्चालन गर्ने कार्यक्रम तय गरिएको आयोगले बुधवार जारी गरेको प्रेस विज्ञप्तिमा उल्लेख छ ।

यसअघि २०७४ जेठ ३१ गते दोस्रो चरणको निर्वाचन गर्ने सरकारको निर्णयानुसार आयोगले जेठ १९ देखि शुरु हुने गरी तालिका प्रकाशन गरेको थियो । सरकारको नयाँ निर्णयानुसार असार २ गतेदेखि शुरु हुने नयाँ निर्वाचन तालिका प्रकाशन गरिएको हो ।