२० जेठ, काठमाडौं-  एमालेले आइतबारको व्यवस्थापिका संसद् बैठक पनि अवरुद्ध पार्ने भएको छ। शनिबार सिंहदरबारस्थित संसदीय दलको कार्यालयमा बसेको स्थायी समिति बैठकले भोली प्रधानमन्त्रीको चुनावका दिन पनि संसद् बैठक अवरुद्ध जारी राख्ने निर्णय गरेको हो।

नयाँ बानेश्वरस्थित संसद् भवनमा भावी प्रधानमन्त्री चयनका लागि उम्मेदवारी मनोनय दर्ता गर्ने समय चलिरहेका बेला सिंहदरबारमा बसेको स्थायी समिति बैठकले राष्ट्रपतिबाट बहुमतीय सरकार गठनका लागि आएको पत्रबारे अनविज्ञता जाहेर गर्दै संसद् अवरोध जारी राख्ने निर्णय गरेको हो। उपाध्यक्ष बामदेव गौतमलाई प्रधानमन्त्रीको उम्मेदवारको रुपमा अघि सार्छ भन्ने टीका टिप्पणी भइरहेको बेला एमालेले प्रधानमन्त्री चयन प्रक्रियाबारे नै अनविज्ञता जनाएको हो।

राष्ट्रपतिद्वारा सरकार गठनका लागि भएको आव्हान निजी विषय, सत्ता पक्ष वा दल विशेष र अँध्यारो कोठामा हुने गठबन्धनका लागि मात्रै नभएको निष्कर्ष निकाल्दै उसले प्रधानमन्त्री चयनको प्रक्रियाबारे नै अनविज्ञता जनाएको हो। चितवनको भरतपुर महानगरपालिकाको रोकिएको मतगणना सुचारु गर्नुपर्ने माग गर्दै नेकपा एमालेले लगातार संसद अवरुद्ध गर्दै आएको छ। बैठक अवरुद्ध भए पनि संसद सचिवालयले सूचना टाँसेर प्रधानमन्त्री निर्वाचनको कार्यतालिका सार्वजनिक गरेको थियो।