लक्ष्मी बैंकबाट सुदेश खालिङ बाहिरिने, तीन महिना मात्र ‘एक्सटेन्सन’ गरे, ‘अब आफ्नै काम गर्छु’
Thursday Sep 27, 2018
वि.सं.२०७५ असोज ११ बिहीवार १३:४५
एभरेष्ट बैंकसँग मर्जको प्रकृयामै रहेका बेला प्रमुख कार्यकारी अधिकृत सुदेश खालिङले लक्ष्मी बैंक छाड्ने निश्चित भएको छ।
चार बर्षे कार्यकालका लागि नियुक्त भएका खालिङले थप समय नबस्ने भएपछि तीन महिना मात्र समय थप गरिएको थियो। लक्ष्मी बैंकबाट मर्जरका लागि लिड गरिरहेका खालिङ अहिले बिदामा अमेरिकामा छन्।
त्यहाँबाट फर्किएपछि केही समयसम्म अझै उनले लक्ष्मी बैंकमा काम गर्ने छन्। उनले त्यसपछि समय नवीकरण नगर्न सञ्चालक समितिलाई भनिसकेका छन्। खालिङ यसअघि स्ट्यानर्डर्ड चार्टर्ड बैंकमा थिए।
जोखिम र ऋणका क्षेत्रमा राम्रो दक्षता भएका खालिङ बैंकर्स संघको कार्यसमिति सदस्य पनि हुन्।
‘म लक्ष्मी छाडेपछि अर्को बैंकमा जाने पक्षमा छैन’ उनले बिजमाण्डूसँग भने, ‘आफ्नै केही गर्ने हो। त्यो समय आएपछि सबैलाई थाहाभइहाल्छ।’ खालिङ सुमन जोशीले तीन कार्यकाल चलाएर बैंक छाडेपछि प्रमुख कार्यकारी अधिकृत भएका हुन्।
३२ बर्ष लामो बैंकिङ अनुभव भएका खालिङ २०६८ साउनदेखि लक्ष्मी बैंक छिरेका हुन्। खालिङको सञ्चालन तथा बैंकिङ जोखिममा लामो अनुभव रहेको छ।
