सर्वोच्चको आदेशपछि तुलसी गौतमले सञ्चय कोष प्रशासकको जिम्मेवारी सम्हाले
Tuesday Sep 07, 2021
वि.सं.२०७८ भदौ २२ मंगलवार १५:३९
सर्वोच्च अदालतको आदेशपछि कर्मचारी सञ्चय कोषका प्रमुख प्रशासक तुलसीप्रसाद गौतमले मंगलवारदेखि फेरि जिम्मेवारी सम्हालेका छन् ।
पुल्चोकस्थित सञ्चय कोषको कार्यालयमा पुगेर गौतमले दिउँसो जिम्मेवारी सम्हालेका हुन् । सर्वोच्च अदालतका न्यायाधीश बमकुमार श्रेष्ठको इजलासले भदौ १७ गते गौतमलाई हटाउने निर्णय कार्यान्वयन नगर्न विपक्षीका नाममा आदेश जारी गरेको थियो ।
‘मैले राम्रो काम गर्दागर्दै सरकारले हटाएको थियो, सर्वोच्च अदालतबाट न्याय पाएर पुनः आएको छु,’ गौतमले कार्यभार सम्हाल्दै भने, ‘नियुक्तिको समयमा सरकारसँग गरेको प्रतिबद्धताअनुसार कार्ययोजना अगाडि बढाउँछु ।’ भदौ ३ गते बसेको मन्त्रिपरिषद् बैठकले गौतमलाई कोषको प्रमुख प्रशासकबाट हटाउने निर्णय गरेको थियो ।
सरकारको निर्णयविरुद्ध गौतमले भदौ ११ गते सर्वोच्चका रिट दायर गरेका थिए । गौतमलाई सरकारले २०७५ वैशाख ४ मा पाँच वर्षका लागि कोषको प्रशासक नियुक्त गरेको थियो । लामो समय निजामती प्रशासनमा बिताएका गौतम अनुभवी प्रशासक मानिन्छन् ।