वाणिज्य आपूर्ति तथा उपभोक्ता संरक्षण विभागको महानिर्देशकमा प्रेमकुमार श्रेष्ठ नियुक्त भएका छन् । पद खाली भएको डेढ महिनापछि मन्त्रालयले श्रेष्ठलाई महानिर्देशकका रुपमा पठाएको हो ।

तत्कालिन प्रमुख प्रकाश पौडेल आन्तरिक राजश्व विभाग गएपछि महानिर्देशकको पद खाली थियो । मन्त्रालयमा मन्त्री नभएका कारण महानिर्देशक पठाउन नसकेको भन्दै मन्त्रालयले डेढ महिनादेखि विभाग निमित्तको भरमा सञ्चालन गरेको थियो ।

सचिवस्तरीय निर्णयबाट आपूर्ति शाखा प्रमुख रहेका श्रेष्ठलाई विभागमा पठाएको मन्त्रालयकी सहप्रवक्ता उर्मिला केसीले बताइन् । श्रेष्ठले हिजोदेखि विभागको जिम्मेवारी सम्हालेका हुन् । स्वदेशी व्यापार विस्तारमा सहयोग, अन्तर्राष्ट्रिय व्यापार सहजीकरण र उपभोक्ता हित संरक्षण एवं स्वच्छ बजार कायम गर्न आफूले अधिकतम् काम गर्ने महानिर्देशक श्रेष्ठको भनाइ छ ।

देशमा संघीय प्रणाली कार्यान्वयनमा आएपछि पाका सहसचिव प्रदेश खटाउने सरकारी नीतिअनुसार श्रेष्ठ लामो समय प्रदेश २ मा रहेर काम गरेका थिए । प्रदेश २ मा खर्च गर्ने कानुनी थिती बसाउन महत्वपूर्ण योगदान गरेका श्रेष्ठले कोभिड–१९ को दोस्रो लहरमा देखिएको अक्सिजन अभाव सहजीकरण गर्ने कार्यदलमा रहेर काम गरेका थिए । देशभरको अक्सिजन अभाव टार्ने कार्यदलको नेतृत्व श्रेष्ठले नै गरेका थिए ।