काठमाडौं ।आगामी जेठबाट साप्ताहिक बिदा दुई दिन हुने भए पनि सेयर बजार भने अहिले जस्तै साताको पाँच दिन नै खुला हुने भएको छ। नेप्सेले जेठबाट सोमबारदेखि शुक्रबारसम्म धितोपत्र कारोबार संचालन गर्ने तयारी भएको जनाएको छ।

नेपालको धितोपत्र बजार सं‌चालक नेप्सेले आइतबार एक सूचना जारी गर्दै साताको पाँच दिन कारोबार खुलाउने जानकारी दिएको हो।
सरकारले जेठदेखि शनिबार र आइतबार गरी सातामा दुई दिन बिदा दिने निर्णय गरेको हो । सो निर्णयका बाबजुद नेप्सेले भने धितोपत्र कारोबार पाँचै दिन खुलाउने जनाएको छ।

हाल पुँजीबजार सातामा शुक्रबार र शनिबारबाहेक पाँच दिन सञ्चालन हुन्छ। सार्वजनिक बिदा अवधि बढाउँदा सेयर बजार पनि समायोजनमा जानुपर्ने हुन्छ। यसो गर्दा सेयर कारोबार सातामा जम्मा तीन दिन हुन जान्छ। उक्त समस्याको निचोडमा नेप्सेले सोमबारदेखि शुक्रबारसम्म कारोबार संचालन गर्ने भएको हो ।

नेप्सेको बैशाख २१ गते बसेको नेप्सेको संचालक समितिको बैठकले सो निर्णय लिएको हो।

नेप्सेकाे सूचनामा भनिएकाे छ, “नेपाल सरकार मन्त्रिपरिषदको मिति २०७९ बैशाख २३ मा बसेको बैठकले २०७९ जेठ १ गते देखि लागु हुने गरी बिहान ९:३० बजे देखि साँझ ५:३० बजे सम्म कार्यालय समय कायम गर्ने, शनिबार र आइतबार साताको दुई दिन सार्वजनिक बिदा दिने निर्णय गरेको हुदाँ सोहि अनुरुप सोमबार देखि शुक्रबार सम्म धितोपत्रको कारोबार गर्ने नेप्से सञ्चालक समितिको मिति २०७९/०१/२१ गतेको निर्णयानुसार जानकारीका लागि अनुरोध छ ।”