काठमाडौ । नेपाल स्टक एक्सचेन्जको कार्यालय सिंहदरबारमा भोलि शुक्रबार पूँजी बजार अभियन्ता तिलक कोइरालाले विशेष घोषणा गर्ने भएका छन् ।

नेपालको पूँजी बजारको बिकासमा अबरुद्ध ढोका खोल्न विशेष घोषणा गर्न लागिएको कोइरालाले बताए । उनले भने ‘ अहिलेलाई यति भन्छु, यो हरेक लगानीकर्ताको गम्भिर सरोकारको विषय हो, जो आउँदैन उ पछुताउँछ ।’
सबै लगानीकर्तालाई भोलि विहान १० बजे नेप्से प्लाजा सिंहदरबारमा आउन आह्वान गरेका छन् ।

पूँजी बजारमा लगातारको गिरावट आएर लगानीकर्ताहरु चरम निराशामा रहेको बेला कोइरालाले के गर्न लागेका हुन भन्ने खुलाएका छैनन्। तर उनले सेयरको मूल्य घटाउने वा बढाउने कुरासँग आफ्नाे घोषणा सम्बन्धित नरहेको र कुनै आन्दोलन पनि नहुने स्पष्ट पारेका छन्।

नेपालको पूँजी बजारको विकास र बिस्तारका लागि भन्दै तीनपल्ट आमरण अनशन बसेर चर्चामा आएका कोइरालाले भोलिको कार्यक्रमबारे भोलि नै जानकारी दिने बताए । कोइरालाले आफ्नो अग्रसरतामा यसअघि भएको आन्दोलनको बलमा अर्थ मन्त्रालयले गठन गरेको अध्ययन समितिले पूँजी बजार सुधारका लागि दिएको ५८ बुँदे सुझाव अझै कार्यान्वयन नगरेको स्मरण गरे ।

हालै धितोपत्र बोर्डसँग भएको १९ बुँदे सहमति पनि अलपत्र रहेको उनको भनाई छ ।