काठमाडौं । नेपाल राष्ट्र बैंकका गभर्नर महाप्रसाद अधिकारीले बैंक तथा वित्तीय क्षेत्रलाई सानो धक्काले असर नगर्ने बताएका छन् । उनले पुँजी पर्याप्तता पनि बढी नै रहेकोले मुलुकको अर्थतन्त्र जोखिममुक्त रहेको प्रष्ट पारेका छन् ।
चालु आर्थिक वर्ष २०७९÷८० को ८ महिनाको वर्तमान आर्थिक तथा वित्तीय स्थितिसम्बन्धी तथ्यांक सार्वजनिक गर्न आयोजित कार्यक्रममा गभर्नर अधिकारीले मुलुकको अर्थतन्त्र सुधारोन्मुख रहेको र वित्तीय क्षेत्र सुरक्षित भएको दावी गरेका हुन् ।

उनले भने, ‘रेमिट्यान्सको सन्र्दभमा उल्लेख्य रुपमा बढेको र पछिल्ला चार महिना १ खर्व भन्दा बढि रेमिट्यान्स नेपालमा भित्रिरहेको अवस्था छ । गत वर्ष ४ खर्बभन्दा बढीले घाटामा रहेको चालु खाता ४४ अर्बले घाटामा छ। शोधनान्तर करिब डेढ खर्बले बचतमा आएको छ।’
२०७९ मा क वर्गका वित्तीय संस्थाहरु वाणिज्य बैकको पुँजी प्राप्त १३ दशमलव ० १ प्रतिशत रहेको छ । ख वर्गको विकास बैंकहरुको १२ दशमलव ७१ प्रतिशत र ग वर्गको फाइनान्स कम्पनीको १७ दशमलव ० ५ प्रतिशत रहेको छ ।
गभर्नर अधिकारीले विदेशी विनियमको सञ्चिति पनि बढ्दै गएको बताए । विदेशी विनियमको सञ्चिति बढेर फागुनसम्म १४ खर्ब १ अर्ब २१ करोड रुपैयाँ बराबरमा पुगेको जानकारी पनि उनले दिए ।

उनले भने ‘ गत असार मसान्तमा १२ खर्ब १५ अर्ब ८० करोड बराबर रहेको कुल विदेशी विनिमयको सञ्चिति ८ महिनाको अवधिमा १५.२ प्रतिशतले वृद्धि भएको छ । जस्ले साढे नौ महिनाको आयात धान्न सक्ने अवस्था छ ।
अर्थतन्त्र प्रतिकुल अवस्थामा रहँदा पनि निरन्तरता दिने उद्यमी व्यवसायी र निरन्तर रुपमा सेवा प्रवाह गर्न नचुक्ने बैकिङ्ग क्षेत्रको कार्यवाट नेपालको अर्थतन्त्र सुरक्षित रहेको बताए ।