काठमाडौं । नियमित उडानहरु कम हुँदा संकटमा परेको भैरहवास्थित गौतम बुद्ध अन्तर्राष्ट्रिय विमानस्थललाई अब नियमित अन्तर्राष्ट्रिय उडानहरु हुने भएका छन् ।

राष्ट्रिय ध्वजावाहक नेपाल वायुसेवा निगम (नेपाल एयरलाइन्स)ले भैरहवास्थित गौतम बुद्ध अन्तर्राष्ट्रिय विमानस्थलबाट भारतको नयाँ दिल्ली र मलेसियाको क्वालालम्पुरका लागि सीधा उडान सञ्चालन गर्ने भएको छ।

उडान आगामी जेठको दोस्रो सातादेखि थाल्ने तयारी नेपाल वायुसेवा निगमको छ ।
निगमका प्रवक्ता रमेश पौडेलले भैरहवाबाट नयाँ दिल्ली र क्वालालम्पुर सीधा उडानका लागि दुवै मुलुकसँग उडान अनुमतिको आवश्यक प्रक्रिया अगाडि बढाइएको जानकारी दिए ।

२०७९ जेठ २ गतेदेखि गौतमबुद्ध अन्तर्राष्ट्रिय विमानस्थल व्यावसायिकरूपमा सञ्चालनमा आएपनि हाल कुबेतको अल जजिराले मात्र नियमित उडान भरिरहेका छ ।

यस्तै हिमालयन एयरलाइन्सले चार्टड उडान भरिहेको छ । बौद्ध धमावलम्बीको बाहुल्यता भएका मुलुकहरू उडानको लक्ष्य राखिएको यस विमानस्थल अझै पनि व्यस्त बन्न सकेको छैन् ।