भक्तपुर । मध्यपुरथिमिको बोडेमा मनाइने ऐतिहासिक जिब्रो छेड्ने जात्रामा २७ वर्षीय सुजन बाग श्रेष्ठले जिब्रो छेडेका छन् ।

पहिलो पटक जिब्रो छेडेका सुजन नौ पटकसम्म जिब्रो छेडेर चर्चा कमाएका बुद्धकृष्ण बाग श्रेष्ठका कनिष्ठ सुपुत्र हुन् ।

मध्यपुरथिमिको बोडेमा हरेक बर्ष हुने मौलिक शैलीको यो जात्रामा जिब्रो छेड्न स्थानीय श्रेष्ठ थरको पुरुष हुनुपर्ने परम्परा छ ।

बुद्धकृष्णले पहिलोपटक २०६२ सालमा जिब्रो छेडाएर २०६५ सालसम्म निरन्तरता दिए । २०६५ देखि २०७२ सम्म भने जुजुभाईले जिब्रो छेडाएका थिए । २०७३ सालदेखि पुनः बुद्धकृष्णले नै जिब्रो छेडेर जात्रालाई निरन्तरता दिएका थिए ।

यसपटक उनका कान्छो छोरा सुजनले जिब्रो छेडाएर परम्परा र पारिवारिक विरासत दुबै धानेका छन् ।