काठमाडौं । एनआईसी एशिया बैंक ले आफ्ना ग्राहकहरूलाई बैंक खातामा स्थायी लेखा नम्बर (प्यान) तथा इमेल ठेगाना अद्यावधिक गर्न अनुरोध गरेको छ।

बैंकले बुधबार जारी गरेको विज्ञप्तिमा खाताबाट काटिएको करको विवरण आयकर ऐन २०५८ बमोजिम नेपाल सरकारको स्थायी लेखा नम्बर प्रणालीमा आबद्ध गर्न आवश्यक भएकाले ग्राहकहरूलाई प्यान अद्यावधिक गर्न आग्रह गरिएको जनाएको छ।

ग्राहकहरूले बैंकको पोर्टलमार्फत वा एनआईसी एशिया मोबैंक एपमा रहेको ‘PAN Update’ विकल्प प्रयोग गरी प्यान अद्यावधिक गर्न सक्नेछन्। साथै, नजिकको शाखा कार्यालयमा निवेदन दिएर पनि प्यान अद्यावधिक गर्न सकिने व्यवस्था मिलाइएको बैंकले जनाएको छ।

बैंकका अनुसार निक्षेपकर्ताको ब्याज भुक्तानीबाट काटिएको करलाई ई–टीडीएस (E-TDS) रेकर्डमा समावेश गर्न प्यान अनिवार्य छ। प्यान अद्यावधिक भएपछि कर कट्टीसम्बन्धी विवरण स्वतः सम्बन्धित प्यानमा प्रविष्ट हुने र आयकर प्रणालीले अनुसूची १० मा कर कट्टीको विवरण मिलान गर्नेछ।

यसबाट ग्राहकहरूले कर कट्टी प्रमाणपत्र तथा कर चुक्ता प्रमाणपत्र प्राप्त गर्न सहज हुने बैंकको विश्वास छ। यद्यपि, प्यान अद्यावधिक नगरिएका कारण ई–टीडीएसमा ब्याज कर दाखिला नभएको वा त्यसपछि कर समायोजन गर्नुपर्ने अवस्था आएमा बैंक जिम्मेवार नहुने स्पष्ट गरिएको छ।

त्यसैगरी बैंकले ग्राहकहरूलाई आफ्नो खातामा रहेको इमेल ठेगाना पनि अद्यावधिक गर्न आग्रह गरेको छ। ग्राहकहरूले बैंकको भिडियो केवाईसी सेवा वा मोबैंक एपको ‘My Profile’ मा रहेको ‘Change Email’ विकल्पमार्फत इमेल ठेगाना अद्यावधिक गर्न सक्नेछन्। आवश्यक परे शाखा कार्यालयमार्फत पनि यो सेवा लिन सकिने बैंकले जनाएको छ।

यसअघि प्यान उपलब्ध गराइसके पनि कर कट्टीको विवरण समावेश नभएको वा इमेल ठेगाना अद्यावधिक नभएको अवस्थामा नजिकको शाखा कार्यालय वा ग्राहक सम्पर्क केन्द्रमा सम्पर्क गर्न बैंकले अनुरोध गरेको छ।
[9:49 PM, 6/10/2026] Surendra Subedi: इप्पानको वरिष्ठ उपाध्यक्षमा उत्तम लामाको उम्मेदवारी : प्रतिबद्धता पत्र सार्वजनिक
स्वतन्त्र ऊर्जा उत्पादकहरूको संस्था, नेपाल (इप्पान) को आगामी निर्वाचनका लागि वरिष्ठ उपाध्यक्ष पदका उम्मेदवार उत्तम लामाले आफ्नो प्रतिबद्धता पत्र सार्वजनिक गरेका छन्। काठमाडौंमा आयोजित कार्यक्रममा लामाले ऊर्जा क्षेत्रको विकास, नीति सुधार तथा संस्थागत सुदृढीकरणलाई केन्द्रमा राख्दै आफ्ना प्राथमिकताहरू सार्वजनिक गरेका हुन्।

उनले इप्पानलाई नीति अनुसन्धान केन्द्रका रूपमा विकास गर्ने, ऊर्जा आयोजना विकास प्रक्रियामा रहेका जटिलता र झन्झटहरू कम गर्न पहल गर्ने तथा अनुमति, स्वीकृति र वातावरणीय प्रक्रियालाई थप सरल र व्यवस्थित बनाउन काम गर्ने प्रतिबद्धता जनाएका छन्।

लामाले संस्थाभित्र सकारात्मक र परिणाममुखी कार्यसंस्कृति विकास गर्ने बताउँदै व्यक्तिगतभन्दा संस्थागत हितलाई प्राथमिकतामा राख्ने धारणा व्यक्त गरे। उनले ‘हामी विरोध होइन–समाधान दिन्छौं’, ‘हामी नारा होइन–संस्था बनाउँछौं’ र ‘हामी व्यक्तिगत होइन–संस्थागत नेतृत्व चाहन्छौं’ भन्ने मूल नारासहित आफ्नो चुनावी अभियान अघि बढाएको जानकारी दिए।

उनका अनुसार इप्पानलाई केवल प्रतिनिधिमूलक संस्थाका रूपमा सीमित नराखी ऊर्जा क्षेत्रका नीतिगत विषयमा अध्ययन, अनुसन्धान र सुझाव दिने सक्षम संस्थाका रूपमा विकास गरिनेछ। ऊर्जा उत्पादकहरूले भोग्दै आएका वित्तीय, कानुनी तथा प्रशासनिक समस्याको समाधानका लागि संस्थाले सक्रिय भूमिका खेल्नुपर्नेमा उनले जोड दिए।

लामाले ऊर्जा क्षेत्रका सरोकारवालाबीच समन्वय, सहकार्य र विश्वास अभिवृद्धि गर्दै निजी क्षेत्रको योगदानलाई थप प्रभावकारी बनाउने प्रतिबद्धता व्यक्त गरे। साथै, संस्थाको आगामी नेतृत्वले सदस्यहरूको साझा हित र ऊर्जा क्षेत्रको दीर्घकालीन विकासलाई केन्द्रमा राखेर काम गर्नुपर्ने उनको भनाइ छ। कार्यक्रममा लामाले आगामी निर्वाचनमा आफ्नो प्यानललाई विश्वास र समर्थन गर्न इप्पानका सदस्यहरूसँग आग्रह गरेका छन् ।