नेपालको सामाजिक र आर्थिक विकासको क्रान्ति असफल : कांग्रेस नेता निधि
Monday Apr 24, 2023
वि.सं.२०८० वैशाख ११ सोमवार २०:५८
काठमाडौं । नेपाली कांग्रेसका पूर्व उपसभापति विमलेन्द्र निधिले देशको सामाजिक र आर्थिक विकासका प्रयास असफल भएको बताएका छन् ।
सोमबार काठमाडौंमा आयोजित नेपाली परिवेशमा लोकतन्त्रका आयाम, विषयक संवाद कार्यक्रममा उनले राजनीतिक दलका नेताहरु दल निमार्णमा मात्र लागेको भन्दै देश विकासमा प्रवेश गर्न नसकेको बताए ।
उनले भने, ‘लोकतन्त्र दिवसमा मेरो सवाल छ की, नेपालको राजनीतिमा अझै दल निमार्ण कै प्राथमिकता हो । राजनीतिक दलका नेताहरु दलकै निमार्णमा लागेका छन् । हामीले ल्याएको संविधान प्रणाली त्यसको बारेमा केही सोच्नु पर्छ लोकतन्त्रको विकल्प लोकतन्त्र नै हुन्छ ।’
निधिले निमार्ण भएको संविधानको पालना र कार्यान्वयन हुनु पर्ने भन्दै गणतन्त्रको विकल्प यो भन्दा राम्रो गणतन्त्र र लोकतन्त्रको विकल्प यो भन्दा राम्रो लोकतन्त्र नै भएको बताए ।
नेपालमा नेपाली जनताले आफ्नो मत प्रयोग गरेर संविधान प्राप्त गरेको ठूलो विषय भएको भन्दै यो एउटा जनताको दस्तावेज हो यसलाई सफल पार्नु पर्छ भने ।
