काठमाडौं । ललितपुर महानगरपालिकाका प्रमुख चिरिबाबु महर्जनले सम्पदाको हित विपरित कुनै पनि सम्झौता नगर्ने प्रष्ट पारेका छन् ।

आईतबार ललितपुरमा आयोजित ललितपुर महानगरपालिकाको सार्वजनिक सुनुवाई कार्यक्रममा प्रमुख महर्जनले सम्पदामा आफुहरुले राम्रो काम गरेको उल्लेख गर्दै सरकारको प्रोत्साहन आफुहरुसंग भएको बताए ।

उनले भने ‘ हामी सम्पदाको लागि कुनै पनि कुरामा सम्झौता गर्दैनौं । त्यसैले हामीले राम्रो काम गरेको हुनाले प्रदेश सरकारले राम्रो तक्मा दिएको छ । ’

यसैगरी ललिपुर महानगरपालिकाकी उपप्रमुख मञ्जली शाक्य बजगाईले जनताको आवश्यकता र विचारको आधारमा महानगरले विकास तथा सुधार गर्न चाहेको बताईन् ।

उनले भनिन ‘ कोठामा बसेर भन्दा यहाँ आएर यसरी यहाँहरुको आवश्यकता र विचारको आधारमा विकास तथा सुधार गर्न चाहन्छौं । हामीले विगतमा गरेका काममा केही सुधार गर्न पर्ने छ की हजुरहरुले थप भनी दिनुहुन्छ भन्ने आशा गरेकी छु । ’

महानगरपालिका र बाहिरी क्षेत्रलाई हेर्दा आफुहरुलाई सन्तुष्टि नमिलेको भन्दै उनले जनता विकासको प्रतीक्षामा रहेको उल्लेख गरिन् ।