काठमाडौं । एनएमबि बैंकले किसानहरुको लागि नयाँ योजना सार्वजनिक गरेको छ । बैंकले आज असार १५ को अवसर पारेर ‘खेती किसानकै लागि’ नामक डिजिटल कर्जाको सुरुवात गरेको हो ।

बैंकले डिजिटल कर्जा प्रवाह गराउनको लागि आज खेती एप र बैकबीच सम्झौता गरेको छ । बैंकले पूर्ण स्वचालित रूपमा किसानलाई कर्जा उपलब्ध गराउने भएको छ । बैंकले खेतीपातिमा संलग्न रहेका नेपाली किसानलाई कर्जा उपलब्ध गराउने उदेश्यले नयाँ कार्यक्रम ल्याएको हो । बैंकले सार्वजनिक गरेको सो कर्जाले आम नेपाली कृषकहरुलाई उत्पादन र व्यवसायिक खेती गर्न सहयोग पुग्ने विश्वास लिएको छ ।

कार्यक्रममा एनएमबि बैंकका सिईओ सुनिल केसीले कृषि, उर्जा र पर्यटनमा मौद्रिक नीति केन्द्रित गर्न आग्रह गरेका छन् । साथै, उनले बैंकले कृषिमा लगानी गर्न प्रोजेक्ट खोजिरहेको र बैंकले बेस रेट प्लस ०।५ प्रतिशतमा ऋण दिरहेको बताएका छन् ।

कार्यक्रमलाई सम्बोधन गर्दै खेती एपका सिइओ तुलसी गिरीले अवको पाइला कृषिलाई डिजिटलाईजेशन गरी उत्पादनमुखी बनाई अगाडी बढाउन कदम चाल्नुपर्ने बताए । साथै, उनले आफ्नो कृषि एपले १०औं बर्षदेखि किसानको दुःखमा साथ दिदै आएको बताएका छन् । खेती एप सबैखाले कृषकहरुको भरपर्दो डिजिटल साथी रहेको खेती एपले जनाएको छ ।

बैंकले एक बर्षदेखि कृषिमा आवद्ध भएका कृषकहरुलाई सो कर्जा उपलब्ध गराउने भएको छ । उक्त कर्जाको सेवा सुविधा प्राप्त गर्नको लागि कृषकहरुलाई कुनै पनि मध्यस्तकर्ताको आवश्यकता नरहेको बैंकले जनाएको छ । कृषकले आफ्नो योग्यता र आवश्यकताको आधारमा खेती एप मार्फत सजिलै कर्जा सुविधा पाउन सक्नेछन् ।