काठमाडौं । सिटिजन्स बैंक इन्टरनेसनल लिमिटेडले प्रमेश राज कायस्थलाई कम्पनी सचिवमा नियुक्त गरेको छ। मंसिर ७ गते बसेको संचालक समितिको बैठकले मंसिर ९ गतेदेखि लागू हुने गरी यो निर्णय गरेको हो।

प्रमेश राज कायस्थले १४ वर्षदेखि बैंकिङ क्षेत्रमा कार्यरत छन्। उनी हाल बैंकको वित्त अधिकृतको जिम्मेवारीमा छन्। साथै उनी बैंकको सहायक कम्पनी सिटिजन्स क्यापिटल लिमिटेडका सञ्चालक पनि हुन्।

सिटिजन्स बैंकले डिजिटल बैंकिङलाई प्राथमिकतामा राख्दै ‘सिटिजन्स फोनपे क्रेडिट कार्ड’ सार्वजनिक गरेको छ। यो कार्डमार्फत् भर्चुअल रूपमा २ लाख ५० हजार रुपैयाँसम्मको क्रेडिट सीमा पाइने बैंकले बताएको छ।

साथै बैंकले ग्राहकहरूको स्वास्थ्यलाई ध्यानमा राखी ‘हेल्थ एण्ड वेल्थ बचत खाता’ पनि ल्याएको छ। यो योजनामा ग्राहकले वर्षको एकपटक निःशुल्क होलबडी चेकअप, पाँच पटक छालाको परामर्श, दुईपटक दाँत र एकपटक आँखाको परामर्श पाउनेछन्।

सिटिजन्स बैंकले देशभर १९७ शाखा, १६२ एटीएम र ७४ शाखारहित बैंकिङ इकाइमार्फत सेवा दिइरहेको छ। बैंकका १८ लाखभन्दा बढी ग्राहक छन्।