काठमाडौं। माछापुच्छ्रे क्यापिटल लिमिटेडले आफ्नो पाँचौं वार्षिकोत्सवको अवसरमा सामाजिक उत्तरदायित्वअन्तर्गत रक्तदान कार्यक्रम आयोजना गरेको छ। कार्यक्रम आज कम्पनीको कार्यालय परिसर, जे.डि.ए. कम्प्लेक्स, बागदरबार, काठमाडौंमा सम्पन्न भयो।

नेपाल रेडक्रस सोसाइटी, भृकुटीमण्डपको सहकार्य र काठमाडौं महानगरपालिकाको सहयोगमा सम्पन्न कार्यक्रममा ५४ जनाले रक्तदान गरेका छन्। रगतको अभावका कारण समाजमा देखिने आपतकालीन अवस्थालाई मध्यनजर गर्दै, संस्थाले आफ्नो विशेष दिनलाई सामाजिक कार्यमार्फत अर्थपूर्ण बनाएको हो।

कम्पनीले वार्षिकोत्सवको अवसरमा जनवरी महिनाभर वित्तीय साक्षरता अभियान, वृद्धाश्रम सहयोग, सेवाहरूमा विशेष छुटलगायतका कार्यक्रमहरू सञ्चालन गर्ने जनाएको छ।

माछापुच्छ्रे बैंक लिमिटेडको सहायक कम्पनी माछापुच्छ्रे क्यापिटल लिमिटेड नेपाल धितोपत्र बोर्डको अनुमति प्राप्त मर्चेन्ट बैंकर हो। कम्पनीले धितोपत्र प्रत्याभूति, लगानी व्यवस्थापन, संस्थागत परामर्श, सामूहिक लगानी कोष सेवा, र निक्षेप सदस्य सेवा प्रदान गर्दै आइरहेको छ।