काठमाडौं । पाथीभरा मन्दिरमा निर्माणाधीन केवलकार परियोजनाको विषयलाई लिएर उत्पन्न विवादले बैंकिङ क्षेत्रलाई प्रभावित बनाएको छ। यसै क्रममा ग्लोबल आईएमई बैंकमाथि भएको आक्रमणप्रति नेपाल राष्ट्र बैंकका निर्देशक गुरुप्रसाद पौडेलले आपत्ति जनाएका छन्।

पौडेलले सामाजिक सञ्जाल फेसबुकमार्फत बैंकमाथिको प्रहारलाई गलत बताएका छन्। उनले लेखेका छन्, “नेपाल राष्ट्र बैंकबाट इजाजतप्राप्त ‘क’ वर्गको वाणिज्य बैंक – ग्लोबल आईएमई बैंकमाथि गरिएको आक्रमण अनुचित हो। कसैको उक्साहटमा आएर उच्छृङ्खल गतिविधिमा संलग्न नहुनु राम्रो हुन्छ।”

पाथीभरा केवलकार परियोजनाले लामो समयदेखि विभिन्न विवादको सामना गर्दै आएको छ। स्थानीय बासिन्दा, धार्मिक संस्थाहरू, र परियोजनासँग जोडिएका निकायहरूबीच मतभेद बढ्दै गएपछि यो विषय झन् चर्किएको देखिन्छ। बैंकमाथिको आक्रमणले स्थिति अझ संवेदनशील बनाएको छ।

विशेषज्ञहरूले यस विवादलाई संवाद र सहमतिबाट समाधान गर्नुपर्ने सुझाव दिएका छन्। बैंकिङ प्रणालीमाथिको आक्रमणले वित्तीय स्थायित्वमा असर गर्न सक्ने भन्दै सरोकारवालाहरूले संयम अपनाउन आह्वान गरेका छन्।