काठमाडौं । नेपाल बैंक लिमिटेडको ६५औं वार्षिक साधारण सभा आज (२०८१ चैत्र ६, बुधबार) काठमाडौंस्थित नेपाल ए.पि.एफ. क्लब, हलचोकमा सम्पन्न भयो। सञ्चालक समितिका अध्यक्ष श्री थानप्रसाद पंज्ञानीज्यूको अध्यक्षतामा सम्पन्न सभाले आर्थिक वर्ष २०८०/८१ को सञ्चालक समितिको वार्षिक प्रतिवेदन, लेखापरीक्षकको प्रतिवेदन र २०८१ आषाढ मसान्तसम्मको वित्तीय विवरणहरू पारित गर्यो।

साथै, सभाले महालेखापरीक्षकको कार्यालयको परामर्श अनुसार आर्थिक वर्ष २०८१/८२ को लागि तीन जना चार्टर्ड एकाउन्टेन्टहरू – श्री प्रदिप कुमार श्रेष्ठ, श्री मधुविर पाण्डे र श्री सृष्टि कोइरालालाई लेखापरीक्षक नियुक्त गर्ने प्रस्ताव सर्वसम्मत रूपमा पारित गर्यो।

यसै सभामा सर्वसाधारण शेयरधनीको तर्फबाट प्रतिनिधित्व गर्ने ३ जना सञ्चालक निर्वाचन गर्ने कार्यतालिका राखिएको थियो। तर, सम्मानित उच्च अदालत, पाटनले २०८१ चैत्र ५ गतेको अल्पकालिन अन्तरिम आदेश जारी गरी यस कार्यक्रमलाई रोक लगाएको छ।

सभामा बैंकको वित्तीय प्रगति, लेखापरीक्षण प्रक्रिया र भविष्यका योजनाहरूबारे छलफल गरिएको थियो। बैंकले आगामी वर्षमा पनि आफ्नो सेवा विस्तार र ग्राहक सन्तुष्टिमा ध्यान केन्द्रित गर्ने योजना बनाएको छ।