काठमाडौं । नेपाल बीमा प्राधिकरणले पुनर्बीमा प्रयोजनका लागि विदेशी मुद्रा सटही सम्बन्धी प्रक्रियालाई थप प्रभावकारी बनाउन विभिन्न व्यवस्था गरेको छ। यस सम्बन्धमा प्राधिकरणले सबै निर्जीवन बीमकहरूलाई विदेशी मुद्रा सटहीका लागि आवश्यक कागजातहरू पेश गर्न निर्देशन दिएको छ।

प्राधिकरणको निर्देशन अनुसार, फ्याकेल्टेटिभ पुनर्बीमा प्रयोजनका लागि विदेशमा रकम पठाउन विदेशी मुद्रा सटहीका लागि बीमकले प्राधिकरणमा प्रस्ताव पेश गर्दा बीमकको पुनर्बीमा निर्देशिका, २०८० बमोजिम नेपालका पुनर्बीमकलाई प्रस्ताव गरेको प्रमाण र नेपालका पुनर्बीमकले उक्त प्रस्ताव २४ घण्टाभित्र अस्वीकार गरेको प्रमाण पेश गर्नुपर्ने व्यवस्था गरिएको छ।

साथै, बीमकले विदेशी पुनर्बीमा कम्पनीसँग पुनर्बीमा गर्दा पुनर्बीमा निर्देशिका, २०८० बमोजिम विदेशी पुनर्बीमा कम्पनी रेटेड हुनुपर्ने र पुनर्बीमा वापत विदेशी मुद्रा भुक्तानी गरेपश्चात् प्रत्येक त्रैमास समाप्त भएको १५ दिनभित्र उक्त विदेशी पुनर्बीमकले भुक्तानी बुझिलिएको प्रमाण नेपाल बीमा प्राधिकरणमा पेश गर्नुपर्ने व्यवस्था रहेको छ।

विदेशी मुद्राको सटही सिफारिसका लागि नेपाल बीमा प्राधिकरणमा पेश हुने पत्रमा बीमकका प्रमुख कार्यकारी अधिकृतको हस्ताक्षर हुनुपर्ने र विदेशी मुद्रा सटहीका लागि पेश गर्ने सबै कागजातका प्रतिलिपिहरूमा बीमकको छाप सहित सम्बन्धित कर्मचारीले हस्ताक्षर गरेको हुनुपर्ने निर्देशनमा उल्लेख गरिएको छ।

यसरी, नेपाल बीमा प्राधिकरणले पुनर्बीमा प्रक्रियालाई सुचारु र पारदर्शी बनाउन विभिन्न व्यवस्था गरेको छ जसले गर्दा बीमा क्षेत्रमा विदेशी मुद्रा सटही सम्बन्धी प्रक्रियाहरू थप प्रभावकारी हुने अपेक्षा गरिएको छ।