काठमाडौँ । विश्व रिसाइक्लिङ डेको अवसरमा खालिसिसि र कोका-कोला बेभरेजेज नेपालले WOW (Well-being Out of Waste) परियोजनाको एक वर्ष पूरा भएको घोषणा गरेका छन्। यस परियोजनाले नेपालमा दिगो विकास, महिला सशक्तीकरण, र फोहोर व्यवस्थापनमा उल्लेखनीय योगदान पुर्याएको छ।

फेब्रुअरी २०२४ मा सुरु भएको यस परियोजनाले १,४४,००० के.जी. PET बोतलहरूलाई ल्यान्डफिलमा जानबाट जोगाएर तिनलाई पुनः उपयोगी स्रोतमा परिणत गरेको छ। बुढानीलकण्ठमा स्थापित मटेरियल रिकभरी फ्यासिलिटी (एमआरएफ) मार्फत PET बोतलहरू संकलन, छानबिन, र पुनर्चक्रण गरिन्छ। एमआरएफको बेलिङ मेसिनले प्रतिदिन १ टन PET बोतलहरूलाई बन्डल बनाउने क्षमता राख्छ, जसलाई पुनःप्रक्रिया गरी पोलिएस्टर स्टेपल फाइबर जस्ता सामग्रीमा रूपान्तरण गरिन्छ।

खालिसिसिका सीईओ अमुन थापाले भने, “WOW परियोजना केवल फोहोर व्यवस्थापनको विषय होइन, यो सामाजिक समानता र दिगोपनको यात्राको सहयात्री समेत हो। महिला तथा फोहोर व्यवस्थापनमा संलग्न मजदुरहरूलाई सशक्त बनाउँदै हामी फोहोरलाई अवसरमा बदल्दैछौं।”

बुढानीलकण्ठ नगरपालिकाका प्रवक्ता नवराज भट्टराईले पनि यस परियोजनाको प्रशंसा गर्दै भने, “WOW परियोजनाले सर्कुलर इकोनोमीको अवधारणालाई अघि बढाउँदै फोहोरमुक्त बुढानीलकण्ठ निर्माणमा महत्वपूर्ण योगदान पुर्याउनेछ।”

यस परियोजनाले ८०% महिलाहरू (३५ जना) लाई फोहोर व्यवस्थापन क्षेत्रमा संलग्न गराएको छ। साथै, ५० जना अनौपचारिक फोहोर संकलनकर्ताहरूलाई डिजिटल साक्षरता, बैंकिङ, र सामाजिक सञ्जालको प्रयोगबारे तालिम दिई आर्थिक आत्मनिर्भरता प्रदान गरिएको छ।

कोका-कोला बेभरेजेज नेपालका पब्लिक अफेयर्स, कम्युनिकेसन एन्ड सस्टेनेबिलिटी डाइरेक्टर स्नेह राजभण्डारीले भने, “WOW परियोजना फोहोर व्यवस्थापन सुधार गर्ने र समुदायलाई सशक्त बनाउने हाम्रो प्रतिबद्धताको प्रमाण हो।”

यस परियोजनाले २० वटा संकलन केन्द्रहरू, खेलकुद केन्द्र, विद्यालय, कलेज, तथा सार्वजनिक कार्यालयहरूमा जिम्मेवार फोहोर व्यवस्थापन र पुनःप्रयोग गर्ने बानी बसाल्न मद्दत गरेको छ। यसले नेपालका युवाहरूलाई रिसाइकल गर्ने बानी बसाल्न प्रेरित गर्दै दीगो भविष्यको निर्माणतर्फ महत्वपूर्ण भूमिका खेल्ने अपेक्षा गरिएको छ।