काठमाडौं । एबीपी इनर्जी प्रालि र सिद्धार्थ बैंक लिमिटेडबीच ८ मेगावाट क्षमताको तादी घ्याङफेदी जलविद्युत आयोजना निर्माणका लागि कर्जा लगानी गर्ने सम्झौता भएको छ। बुधवार काठमाडौंमा आयोजित कार्यक्रममा एबीपी इनर्जीका अध्यक्ष पूर्णलाल श्रेष्ठ र सिद्धार्थ बैंकका क्रेडिट हेड अमित श्रेष्ठले सम्झौतापत्रमा हस्ताक्षर गरे।

यस आयोजनाको कूल लागत १ अर्ब ६४ करोड रुपैयाँ रहेको छ। कुल लागतको ७५ प्रतिशत (१ अर्ब २३ करोड रुपैयाँ) सिद्धार्थ बैंकले दीर्घकालीन ऋणको रूपमा उपलब्ध गराउनेछ भने बाँकी २५ प्रतिशत (४१ करोड रुपैयाँ) स्वपुँजीबाट व्यवस्थापन गरिनेछ।

नुवाकोट जिल्लाको दुप्चेश्वर गाउँपालिकामा अवस्थित यो आयोजना १८ महिनाभित्र पूरा गर्ने लक्ष्य राखिएको छ। आयोजनाबाट व्यावसायिक विद्युत उत्पादन २०८४ बैशाख ३१ गतेदेखि शुरू हुनेछ। यसले वार्षिक ४ करोड ८७ लाख युनिट विद्युत उत्पादन गरी २९ करोड रुपैयाँ आम्दानी गर्ने अपेक्षा छ।

आयोजनाको निर्माण एबीपी इनर्जीले गरिरहेको छ भने यसका सञ्चालकमा इप्पानका महासचिव बलराम खतिवडा, सूचना प्रविधि क्षेत्रका असगर अली लगायत रहेका छन्। खतिवडाका अनुसार, आयोजनाले हाइड्रो टुरिजमबाट पनि आम्दानी गर्ने लक्ष्य राखेको छ। गोसाइंकुण्ड जाने ट्रेकिङ रुटमा रहेको आयोजनाले बनाएका क्याम्प हाउसलाई होमस्टेमा परिणत गरी पर्यटकलाई हस्पिटालिटी सुविधा दिने योजना छ।

आयोजनाको डिजाइन डिस्चार्ज २.२ क्यूसेक रहेको छ भने ३ हजार ९०० मिटर पाइपलाइन र ४४६ मिटर हेड रहेको छ। यसले सुख्खायाममा १५.९७ गिगावाट आवर र वर्षामा ३२.७७ गिगावाट आवर ऊर्जा उत्पादन गर्नेछ।

आयोजनाको लागि विद्युत विकास विभागबाट २०७८ असार ३१ मा उत्पादन अनुमतिपत्र प्राप्त भएको थियो भने २०७८ भदौ २७ मा विद्युत खरिद बिक्री सम्झौता सम्पन्न भएको थियो।