काठमाडौँ । रिलायबल नेपाल लाइफ इन्स्योरेन्स लिमिटेडले कोष प्रबद्र्धकको रुपमा तथा रिलायबल इन्भेष्टमेन्ट एण्ड मर्चेन्ट क्यापिटल लिमिटेड योजना व्यवस्थापकको रुपमा रहने गरी “रिलायबल सामूहिक लगानी कोष” अन्तर्गतको पहिलो बन्दमुखी योजना “रिलायबल समृद्धि योजना” बैशाख ३ गतेदेखि सार्वजनिक निष्काशनमार्फत विक्री खुला गरेको छ।

एक अर्ब रुपैयाँको कोष आकार रहेको यस योजनामा आठ करोड पचास लाख इकाई (रु. ८५ करोड बराबर) सर्वसाधारणका लागि निष्काशन गरिएको हो। यो योजना बन्दमुखी भएकाले यसका इकाईहरू धितोपत्र बजारमा सूचिकृत भई खरिद-बिक्री गर्न सकिनेछ।

नेपालमा बीमा क्षेत्रबाट कोष प्रबद्र्धन गरिएको यो पहिलो सामूहिक लगानी कोष हो। योजना व्यवस्थापकका अनुसार वार्षिक औसत प्रतिफल १७.७३ प्रतिशत रहने प्रक्षेपण गरिएको छ।

सार्वजनिक निष्काशन बैशाख ३ गतेदेखि प्रारम्भ भई छिटोमा बैशाख ७ गते र ढिलोमा बैशाख १७ गतेसम्म खुला रहनेछ। इच्छुक व्यक्तिगत तथा संस्थागत लगानीकर्ताहरूले न्यूनतम १ हजारदेखि अधिकतम १० करोड रुपैयाँसम्म लगानी गर्न सक्नेछन्। आवेदन सी-आश्वा खाता भएका बैंक तथा वित्तीय संस्थामार्फत वा मेरो शेयर प्लेटफर्म प्रयोग गरी अनलाइनमार्फत दिन सकिनेछ।

कम्पनीले लगानीकर्तालाई दीर्घकालीन रूपमा उत्कृष्ट प्रतिफल दिने प्रतिवद्धता व्यक्त गरेको छ।