काठमाडौं। नेपालका लागि पाकिस्तानका राजदूत महामहिम अबरार एच. हाश्मीले आज नेपाल संघीय संसद अन्तर्गत रहेको पाकिस्तान-नेपाल संसदीय मैत्री समूहसँग भेटवार्ता तथा छलफल गर्नुभयो। सो कार्यक्रममा मैत्री समूहका सम्माननीय सांसदहरू, पाकिस्तान दूतावासका कूटनीतिज्ञहरू तथा नेपाल–पाकिस्तान मैत्री तथा सांस्कृतिक संघका प्रतिनिधिहरूको उपस्थिति रहेको थियो।

भेटका क्रममा राजदूत हाश्मीले पाकिस्तान र नेपालबीचको पुरानो र सौहार्दपूर्ण सम्बन्धको चर्चा गर्दै दुई देशबीचको सांस्कृतिक सम्पदा, आपसी सम्मान र क्षेत्रीय नातालाई स्मरण गर्नुभयो। उहाँले जनस्तरसम्मको सम्बन्धलाई अझ बलियो बनाउने आवश्यकता औंल्याउँदै, व्यापार, पर्यटन, शिक्षा, स्वास्थ्य, संस्कृति, जलवायु सहनशीलता, जनस्तरको सम्बन्ध (P2P) र क्षेत्रीय शान्तिको प्रवर्द्धनमा सहकार्य विस्तार गर्ने पाकिस्तानको इच्छालाई दोहोर्याउनुभयो।

राजदूतले पाकिस्तानको आर्थिक अवस्था र क्षेत्रीय परिदृश्यबारे पनि जानकारी दिँदै दक्षिण एशियाको समृद्धि र शान्तिका लागि पाकिस्तानको दृष्टिकोण प्रस्तुत गर्नुभयो। साथै, उहाँले संसदीय कूटनीति तथा संस्थागत सम्बन्ध विकासमा नेपाली संसदको चासोप्रति स्वागत व्यक्त गर्नुभयो।

मैत्री समूहका सांसदहरूले नेपालप्रति पाकिस्तानको निरन्तर सहयोगको कदर गर्दै द्विपक्षीय सम्बन्धमा कुनै प्रकारको अवरोध नरहेकोमा सन्तुष्टि व्यक्त गरे। उनीहरूले आर्थिक, सांस्कृतिक, युवा, महिला, सीमान्तकृत वर्ग, प्रविधि तथा क्षमता विकासका क्षेत्रमा नयाँ सहकार्यको खोजी गर्न जोड दिए।

दुबै पक्षले दुई देश तथा जनताको हितमा संस्थागत सम्बन्ध सुदृढ गर्दै, खुला संवाद तथा बहुआयामिक सहकार्य विस्तार गर्दै अगाडि बढ्ने प्रतिबद्धता व्यक्त गरे।