काठमाडौं । नेपाल सरकारका सम्माननीय प्रधानमन्त्री श्री केपी शर्मा ओलीज्यू शनिबार बिहान हिमालय एअरलाइन्सको विशेष कूटनीतिक उडानमार्फत जनवादी गणतन्त्र चीनको तिआन्जिन प्रस्थान गर्नुभएको छ ।

प्रधानमन्त्री ओलीसँगै धर्मपत्नी श्रीमती राधिका शाक्य, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, आर्थिक तथा विकास सल्लाहकार युवराज खतिवडा तथा अन्य उच्च पदस्थ सरकारी अधिकारीसमेत प्रतिनिधिमण्डलमा सहभागी हुनुहुन्छ । टोली सेप्टेम्बर ३, २०२५ मा बेइजिङ्गबाट नेपाल फर्कने कार्यक्रम छ ।

एयरबस ३१९–११५ वायुयान शनिबार बिहान ०७ः२३ बजे त्रिभुवन अन्तर्राष्ट्रिय विमानस्थलबाट उडेको थियो र स्थानीय समय दिउँसो १५ः१५ बजे तिआन्जिन बिन्हाई अन्तर्राष्ट्रिय विमानस्थलमा सुरक्षित अवतरण गरेको हो ।

त्रिभुवन अन्तर्राष्ट्रिय विमानस्थलमा हिमालय एअरलाइन्सका अध्यक्ष झो एन्योंगले प्रधानमन्त्री ओली, उनकी धर्मपत्नी र प्रतिनिधिमण्डललाई स्वागत गर्नुभयो । त्यस्तै, उपाध्यक्ष (प्रशासन) विजय श्रेष्ठले प्रधानमन्त्री र भ्रमण टोलीलाई बिदाइ गर्न उपस्थित रहनुभयो ।

विशेष उडानबारे विजय श्रेष्ठले भन्नुभयो, “सरकार प्रमुखको औपचारिक भ्रमणका लागि उडान सञ्चालन गर्नु हिमालय एअरलाइन्सका लागि ठूलो गौरव हो । नेपाल सरकारको सद्भाव र सहयोगप्रति आभार व्यक्त गर्दै हामी भविष्यमा पनि राष्ट्रको सेवामा समर्पित रहन्छौं ।”