काठमाडौं । अपि पावर कम्पनी लिमिटेडको बहुमत सेयर लगानी रहेको सूर्यकुण्ड हाइड्रो इलेक्ट्रिक लिमिटेडले नुवाकोट जिल्लाको दुप्चेश्वर गाउँपालिकामा निर्माण सम्पन्न गरेको ११ मेगावाट क्षमताको माथिल्लो तादी खोला जलविद्युत आयोजनाले व्यवसायिक उत्पादन सुरु गरेको छ ।

कम्पनीका अनुसार आयोजना २०८२ असार १८ गते निर्माण सम्पन्न भई १५ दिनको परीक्षण सञ्चालन सफलतापूर्वक पूरा गरेको थियो । परीक्षण चरणपछि २०८२ साउन १२ गतेदेखि नियमित रूपमा राष्ट्रिय प्रसारण प्रणालीमा बिजुली आपूर्ति सुरु भएको हो ।

सन् २०१२ (२०६८ चैत्र ३) मा नेपाल विद्युत प्राधिकरणसँग विद्युत खरिद सम्झौता भएको यस आयोजनाले २०७२ असोज २२ मा उत्पादन इजाजतपत्र प्राप्त गरेको थियो भने वातावरणीय प्रारम्भिक अध्ययन (IEE) २०८१ असोज ८ मा ऊर्जा मन्त्रालयबाट स्वीकृत भएको हो ।

आयोजनाबाट दुईवटा पेल्टन टर्बाइन (प्रत्येक ५.५ मेगावाट) मार्फत कुल ११ मेगावाट विद्युत उत्पादन हुनेगरी डिजाइन गरिएको छ । अनुमानित वार्षिक उत्पादन ६१.३१९ गीगावाटघण्टा रहनेछ, जसमा ५०.८९३ जीडब्ल्यूएच वर्षायाममा र १०.४२५ जीडब्ल्यूएच सुख्खा मौसममा उत्पादन हुनेछ ।

सूर्यकुण्ड हाइड्रोबाट उत्पादित विद्युत ६ किलोमिटर लामो ३३ केभी ट्रान्समिशन लाइनमार्फत नुवाकोटको समुन्द्रटार सबस्टेशन हुँदै राष्ट्रिय ग्रिडमा आपूर्ति भइरहेको छ ।

कम्पनीको आइपिओ प्रक्रिया हाल नेपाल धितोपत्र बोर्ड (SEBON) को पाइपलाइनमा रहेको छ । यस आयोजनाबाट वाग्मती प्रदेशसहित मुलुकको विद्युत आपूर्तिमा थप योगदान पुग्ने अपेक्षा गरिएको छ ।