काठमाडौँ । मारुती सुजुकीले आफ्नो बहुप्रतिक्षित नयाँ एसयूभीको नाम सार्वजनिक गरेको छ। पहिला वाई–१७ कोडनेम दिइएको यो मोडललाई मारुती एस्कुडोको रूपमा चिनिँदै आएको भए पनि अब यसलाई आधिकारिक रूपमा “भिक्टोरिस” नाम दिइएको छ।

मारुती भिक्टोरिसलाई कम्पनीले आफ्नो एसयूभी लाइनअपमा ब्रेजा र ग्रान्ड भिटाराको बीचमा राख्ने तयारी गरेको छ। यो सुजुकीको ग्लोबल–सी प्लेटफर्ममा आधारित हुनेछ, जसले उत्पादन लागत घटाउने मात्र होइन, ग्रान्ड भिटारा र टोयोटा हाइराइडरमा पाइने सुविधा पनि प्रदान गर्नेछ।

४३४५ एमएम लम्बाईको भिक्टोरिसले हुन्डाई क्रेटा र किया सेल्टोससँग सीधा प्रतिस्पर्धा गर्नेछ। साथै आगामी २०२६ मा आउने किया सेल्टोस फेसलिफ्ट, स्कोडा कुशाक फेसलिफ्ट र फक्सवागन टाइगुन फेसलिफ्टलाई पनि चुनौती दिने अपेक्षा गरिएको छ।

यसमा १.५ लिटर नेचुरली एस्पिरेटेड पेट्रोल इन्जिन उपलब्ध हुनेछ, जसले १०३ पीएस पावर र १३९ एनएम टर्क उत्पादन गर्नेछ। सो इन्जिन ५-स्पिड म्यानुअल र ६-स्पिड अटोमेटिक गियरबक्स विकल्पमा पाइनेछ। साथै १.५ लिटर स्ट्रङ हाइब्रिड पावरट्रेन पनि प्रस्ताव गरिनेछ, जसको संयुक्त पावर ११५.५ पीएस हुनेछ।

त्यस्तै, मारुतीले भिक्टोरिसको सीएनजी भेरिएन्ट पनि ल्याउने तयारी गरेको छ, जसले ८८ पीएस पावर दिनेछ।

नयाँ मारुती भिक्टोरिसको आधिकारिक लन्च आगामी सेप्टेम्बर ३, २०२५ मा हुने तय गरिएको छ।