काठमाडौँ । झापा इनर्जी लिमिटेडले आजदेखि आम सर्वसाधारणका लागि प्राथमिक शेयर (आईपीओ) निष्कासन गरेको छ । कम्पनीले १०० रुपैयाँ अंकित मूल्यका ४ लाख ७३ हजार ३३६ कित्ता शेयर जारी गरेको हो, जसको कुल मूल्य ४ करोड ७३ लाख ३३ हजार रुपैयाँ बराबर हुन्छ।

जारी गरिएका शेयरमध्ये २८ हजार ५१४ कित्ता सामूहिक लगानी कोषका लागि तथा ११ हजार ४०६ कित्ता कम्पनीका कर्मचारीका लागि छुट्टाइएको छ। बाँकी शेयरमा आम सर्वसाधारणले आवेदन दिन सक्नेछन्।

लगानीकर्ताले न्यूनतम १० कित्ता र अधिकतम ५ हजार कित्तासम्मको लागि आवेदन दिन सक्नेछन्। आवेदन प्रक्रिया आस्बा सदस्य बैंक तथा वित्तीय संस्थाका शाखाहरू र मेरो शेयरमार्फत गर्न सकिने व्यवस्था छ।

आईपीओमा आवेदन दिने अवधि छिटोमा भदौ २४ गतेसम्म र ढिलोमा असोज ३ गतेसम्म खुला रहनेछ।

आईपीओ रेटिङको आधारमा इक्रा नेपालले झापा इनर्जी लिमिटेडलाई ‘सिंगल बी माइनस’ (ICRANP-IR B-) प्रदान गरेको छ, जसले कम्पनीमा उच्च जोखिम रहेको संकेत गर्दछ।

यस आईपीओको बिक्री प्रबन्धकको जिम्मेवारी हिमालयन क्यापिटल लिमिटेडले लिएको छ। यसअघि झापा इनर्जी लिमिटेडले आयोजना प्रभावित क्षेत्रका स्थानीयवासी र वैदेशिक रोजगारीमा रहेका नेपालीका लागि आईपीओ जारी गरिसकेको थियो।