काठमाडौं । जेन–जेड अभियन्ताहरूको आह्वानमा भएको आन्दोलनपश्चात मुलुक इतिहासकै कठिन क्षण पार गर्दै शान्तिपूर्ण अवतरणतर्फ उन्मुख भइरहेको सन्दर्भमा बैंक तथा वित्तीय संस्था परिसंघ नेपाल (सिबिफिन) ले आफ्नो धारणा सार्वजनिक गरेको छ ।

सिबिफिनले प्रेस विज्ञप्ति जारी गर्दै आन्दोलनको क्रममा जीवन गुमाएका युवाहरू, सुरक्षाकर्मी र सम्पूर्ण दिवंगत आत्माप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेको छ । साथै सम्पूर्ण घाइतेहरुको शीघ्र स्वास्थ्य लाभको कामना गरिएको छ ।

विज्ञप्तिमा आन्दोलनका क्रममा देखिएका निहीत स्वार्थप्रेरित आक्रमणले सरकारी, सार्वजनिक र निजी सम्पत्तिमा भएको अपूरणीय क्षतिप्रति गहिरो दुःख व्यक्त गरिएको छ । यद्यपि, यस आन्दोलनले सुशासनयुक्त नयाँ नेपाल निर्माणको स्पष्ट सन्देश दिएको उल्लेख गर्दै बैंक तथा वित्तीय क्षेत्र नवगठित सरकारसँग हातेमालो गर्दै समुन्नत राष्ट्र निर्माणको अभियानमा तत्पर रहने प्रतिबद्धता सिबिफिनले जनाएको छ ।

साथै, अकल्पनीय आक्रमण र क्षतिबाट प्रभावित निजी क्षेत्रलाई संरक्षण गर्दै लगानी, व्यवसाय र रोजगारीका लागि सुरक्षित वातावरण बनाउन सरकारले पहल गर्ने विश्वास सिबिफिनले व्यक्त गरेको छ । बैंक तथा वित्तीय संस्थाहरुमाथि क्षति पु¥याउने तत्वप्रति सजग रहँदै सहज र सुरक्षासहित बैंकिङ सेवा प्रवाहका लागि आवश्यक सहयोग गर्न समेत सिबिफिनले आग्रह गरेको छ ।