काठमाडौं । हालैका विषम परिस्थितिमा घटेका विभिन्न दुःखद घटनाबाट जिउधन तथा सम्पत्तिमा भएको क्षतिप्रति महालक्ष्मी विकास बैंकले गहिरो दुःख व्यक्त गरेको छ । बैंकले एक विज्ञप्ति जारी गर्दै दिवंगत आत्माको चिरशान्तिको कामना गर्दै शोकसन्तप्त परिवारलाई धैर्य धारण गर्ने शक्ति मिलोस् भन्ने शुभेच्छा व्यक्त गरेको छ । साथै घाइतेहरुको शीघ्र स्वास्थ्य लाभको कामनासमेत गरेको छ ।

बैंकले विज्ञप्तिमा सरकारी, सार्वजनिक र निजी सम्पत्तिमा भएको क्षतिप्रति समेत दुःख प्रकट गरेको छ । साथै, हाल सुरु भएको सरकार गठन प्रक्रियाले चाँडै टुंगिएर मुलुकलाई सामान्य अवस्थामा ल्याई शान्ति, सुशासन, निष्पक्ष व्यवसायिक वातावरण, आर्थिक स्थायित्व र सुरक्षाको प्रत्याभूति दिने विश्वास व्यक्त गरेको छ ।

उक्त घटनामा बैंकको पोखरा लेकसाइड शाखा रहेको भवन पूर्णरुपमा क्षतिग्रस्त भएको र त्यहाँका सेवा नजिकैका शाखामार्फत लिन सकिने जनाएको छ । लेकसाइड शाखा बाहेक बैंकका अन्य १०२ शाखाहरु भने पूर्णरुपमा सञ्चालनमा रहेका साथै सम्पूर्ण डिजिटल सेवाहरु सुरक्षितरुपमा सञ्चालन भइरहेको बैंकले जानकारी दिएको छ ।